O PP de Ribadeo denuncia a sucidade e o abandono en varias zonas do concello

Ribadeo, 17 de outubro de 2013. O presidente do Partido Popular de Ribadeo, Jesús López Penabad, critica ao goberno local pola gran cantidade de excrementos de cans que hai nas beirarrúas da vila e polo abandono no que están lugares como o parque do Mineral ou as antigas vivendas dos profesores, na rúa Francisco Lanza.

Jesús López Penabad denuncia o estado no que se atopan as beirarrúas de Ribadeo, porque “son un auténtico asco, pois hai que ir sorteando os excrementos dos cans. Eu non sei se un problema de falta de persoal para limpar ou se hai outro motivo. Creo que o Concello, concretamente o concelleiro de Medio Ambiente, Horacio Cupeiro, ten que poñerse as pilas, porque pasear por Ribadeo hoxe sorteando os excrementos dos cans é algo cotián entre os viandantes. E iso deixa bastante que desexar dun pobo do que sempre presumimos do bonito que é, pero realmente está abandonado ao máximo”.

Por outra parte o presidente dos populares ribadenses denunciou o mal estado no que se atopa o parque do Mineral: “quero recordar, porque xa o dixemos en reiteradas ocasións, que no parque do Mineral, á entrada de Ribadeo antes do Parador, as vallas seguen caídas e rotas; e aquel peche que puxeron cun cordón, que parece para animais máis que para persoas, xa rompeu tamén. Aquilo está en condicións lamentables e dá unha imaxe penosa e ademais existe inseguridade”.

López Penabad tamén se lembrou das antigas vivendas dos profesores do instituto, porque “alí mandaron xente para intentar pechar aquilo, pero non o fixeron. E ademais alí hai unha silveira con condicións insalubres para os veciños. Non é que o diga o Partido Popular, calquera que se pase por alí pode preguntarlles aos veciños, que están fartos de ver aquilo así día tras día, mes tras mes e, a este paso, ano tras ano. Paréceme que non é tan difícil mandar persoal para que vaia desbrozar e limpar aquilo; e despois pechalo en condicións”.

Para rematar o presidente do PP comentou que “isto pode velo calquera viandante que pase por Ribadeo e realmente dá pena. Este pobo tan bonito que temos deixa bastante que desexar, por culpa duns gobernantes ineficaces”.