A Área de Deporte da Deputación concede ao Burela FSF un premio excepcional por valor de 24.000 euros

Lugo, 4 de novembro de 2013. O vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga, anunciou a mañá deste luns na rolda de prensa posterior á Xunta de Goberno da institución provincial, que a institución provincial acordou conceder un premio económico por valor de 24.000 euros ao Burela FSF pola consecución da Liga Estatal Feminina de Primeira División de Fútbol Sala 2012 – 2013 e da XIX edición da Copa de Fútbol Sala Feminino.

Neste sentido, Veiga precisou que “é a primeira vez que un equipo na provincia de Lugo gaña a liga na máxima categoría estatal, e iso desde logo que é un motivo de ledicia é de orgullo que, ademais, dá boa medida de como está o deporte lucense, no que a Deputación de Lugo sigue sendo un ano máis a institución provincial que máis cartos inviste por habitante e ano; só nos superan os cabildos insulares e as Deputacións Forais Vascas, ambas cun réxime tributario distinto”.

“Desde logo, – continuou o vicepresidente – todo o que está acontecendo en Lugo co deporte non é casualidade, posto que vemos como desde outras administracións non hai a mesma correspondencia con ese traballo que se fai co deporte desde a Deputación”

A Vicepresidencia da Deputación de Lugo quere premiar a este equipo mariñán por esa xesta que conseguiu ao ser o primeiro en gañar para a provincia de Lugo unha liga a nivel estatal, e por outra banda, por tratarse dun equipo feminino. “Curiosamente, o primeiro club en gañar unha liga a nivel estatal non está formado por homes, senón por mulleres, algo que para nós é moi importante. Esta é a nosa aposta polo deporte en xeral, e polo deporte feminino en particular”, afirmou Veiga.