Feijóo anuncia a inmediata adxudicación da ampliación do Hospital da Costa

Santiago, 10 de setembro de 2014.- O presidente da Xunta, Alberto Núñez Feijóo garantiu este mércores no Parlamento o compromiso do Goberno galego coa viabilidade económica dos servizos públicos e anunciou a inmediata adxudicación da ampliación do Hospital da Mariña. “En Galicia estamos preocupados e comprometidos coa viabilidade económica dos servizos públicos, da sanidade pública, da educación pública e dos servizos sociais”, aseverou, logo de avanzar que mañá se coñecerá a adxudicación do proxecto construtivo de ampliación e Plan director do Hospital da Mariña.

Nesta mesma liña, durante a sesión de control no Pleno da Cámara galega, Feijóo afirmou que o Executivo autonómico seguirá apostando pola sanidade pública, como proba a posta en funcionamento do Hospital público de Lugo, ao que sumou o avanzado estado do maior Hospital público que se está facendo en España, que é o hospital público de Vigo, así como as obras no Hospital público de Ourense e os avances na licitación do Hospital público do Salnés.

En materia de benestar, Feijóo salientou que a ratio de atención á dependencia na Comunidade –porcentaxe entre atendidos e o total de persoas que teñen dereito- é do 68,4%, é dicir, 38 puntos máis con respecto ao ano 2009, cun 30,4%.

Así mesmo, incidiu en que Galicia é a segunda comunidade autónoma despois de Madrid que máis servizos creou neste eido e lembrou que no ano 2009, “cando chegamos ao Goberno”, cobraban en Galicia 14.000 dependentes e agora cobran mensualmente 38.000, pese a que o orzamento actual supón un 20% menos de recursos do que tiña o Goberno anterior.

Ademais de destacar o incremento dun 94% do número de persoas que están percibindo a RISGA, e un incremento do 74% do seu presuposto, o presidente autonómico lembrou que Galicia conta na actualidade con 7.000 prazas públicas máis de garderías, de centros de día, de centros da terceira idade, de prazas de discapacitados e de prazas de alzhéimer.

Se ben recoñeceu que a sociedade galega está virando cara a un cambio de tendencia positivo: máis crecemento económico, menos desemprego e máis afiliacións á Seguridade Social, Feijóo aseverou que o paro segue a ser a prioridade do Goberno galego. “Temos case 237.000 mulleres e homes en paro e, iso, sen dúbida, segue a ser o primeiro problema e é a clave de calquera política social”, dixo.

O responsable autonómico concluíu a súa intervención, afirmando que os servizos públicos na Comunidade teñen “máis futuro hoxe do que tiñan no ano 2013, 2011, 2010, 2009, 2008 e no ano 2007”. “A Galicia que nós recibimos destruía 51.000 empregos no último ano e tiña unha recesión, a través da baixada do PIB, de máis do 3,2%. Pola contra, a Galicia de hoxe ten un lixeiro incremento do PIB e está reducindo en máis de 20.000 as persoas paradas que tiña hai un ano”.