Vicepresidencia da Deputación organiza 3 actos para conmemorar o 25 N e seguir loitando contra a violencia de xénero

Lugo, 19 de novembro de 2014. O vicepresidente e responsable de Benestar, Deportes e Igualdade da Deputación, e o delegado de Cultura e Turismo, os nacionalistas Antonio Veiga e Mario Outeiro, presentaron esta mañá no Museo Provincial os actos que organiza a Vicepresidencia Primeira do organismo provincial para conmemorar o 25 de novembro, Día Internacional contra a violencia de xénero, baixo os lemas O machismo mata e Cambiar o conto é cousa de todas/os. A presentación levouse a cabo na sala de Arte Galega do museo lugués, co cadro A Chacharreira, do vilalbés Antonio Ínsua, como testigo, co que se quixo simbolizar a importancia que sempre tivo a muller no mundo do traballo en Galiza e noutros eidos como a cultura.

Os deputados nacionalistas recordaron que estas actividades teñen como obxectivo primordial “insistir na concienciación e resolución desta grave problemática social, algo que non debe quedar circunscrito única e exclusivamente ao 25 de novembro, xa que mulleres son asasinadas durante todo o ano en toda Galiza e todo o Estado, polo que debe haber resposta todos os días do ano”, indicou Veiga.

O vicepresidente provincial recordou que “dende o ano 2013, en todo o Estado van asasinadas máis de 750 mulleres, un dato suficientemente tráxico para remover conciencias e levarnos a todos e a todas a reflexionar sobre un problema, a violencia exercida contra as mulleres, que en pleno século XXI só pode ser abordado dun xeito global, integral e como un verdadeiro asunto de Estado. Desde as institucións temos que actuar e por iso, no noso compromiso de reforzar a nosa loita contra esta violencia, organizamos outro ano máis no Museo Provincial e no Pazo de San Marcos varias actividades ás que convidamos ás e aos lucenses, xa que é necesario que nos involucremos todas e todas”, remarcou.

Programa de actos
O primeiro acto terá lugar este xoves 20 de novembro coa proxección no Museo Provincial de Lugo do documental ‘Muller(es)Muller’ e posterior debate coa participación de Inés Pintor, protagonista e directora do documental, e María Reimóndez, escritora e tamén protagonista. A proxección dará comezo ás 20 horas e a entrada será aberta e de balde, ata completar aforo.

O programa do 25 de novembro terá continuidade o mércores, día 26, no sala de exposicións do Pazo de San Marcos. Alí se representará, a partir das nove da noite, a obra ‘Mal Tratadas’, a cargo de Microefectos Dramatúrxicos. A entrada tamén será gratuíta.

Pecharanse as actividades deste ano o venres, día 28, coa contacontos Soledad Felloza, que lle ofrecerá aos máis pequenos da casa o seu conto ‘Érase dúas veces… (unha segunda oportunidade para os contos de sempre)’. Este acto terá lugar tamén no salón de actos do Pazo de San Marcos e comezará ás 17.30 horas con entrada libre.

Documental ‘Muller(es)Muller’
Inés Pintor reúne no documental que se proxectará mañá a mulleres a avoas, netas e nais co fin de analizar a transformación das mulleres ao longo destas tres xeracións. Deste xeito, reflexionarán sobre a transformación levada a cabo nos últimos anos coas experiencias persoais de mulleres de distintos ámbitos, idades e profesións, comprobando desta maneira como viviron e viven estes cambios en primeira persoa. As súas reflexións, a través dunha animada charla-debate, demostráronlle ao equipo que produciu o documental o mal que se emprega habitualmente a frase da “actual incorporación da muller ao mundo laboral”, xa que moitos dos traballos que realizaban dende hai moitos anos e aínda realizan nalgúns casos, por exemplo, os domésticos, non están regulados nin gozan da visibilidade precisa.

Unha das conclusións que se tiran é que as mulleres teñen colaborado tanto ou máis que os homes nas economías familiares co gran inconveniente de non seren valoradas por elo. Esta situación corrixiuse un pouco nos últimos tempos, pero aínda hoxe se atopan desigualdades salariais e de acceso aos cargos de maior responsabilidade.