Tráfico inicia este luns en Galicia unha campaña para evitar os atropelos de peóns

A Delegación do Goberno en Galicia informa de que o Sector de Tráfico da Garda Civil en Galicia desde este luns 23 de febreiro, iniciará unha campaña especial para a prevención de atropelos que consistirá nun incremento da vixilancia e control dos peóns en estrada así como na entrega de chalecos reflectantes a aqueles camaniñtes que estando obrigados a levalo por falta de visibilidade ou meteoroloxía adversa, non fagan uso de ningún tipo de elementos que garantan a súa visibilidade e en definitiva, a súa seguridade.

Un dos obxectivos prioritarios da DGT en Galicia é a protección dos usuarios máis vulnerables na estrada, os peóns, tendo en conta do peso que teñen os atropelos mortais na accidentabilidade interurbana na nosa comunidade. No ano 2014 faleceron en estradas de Galicia 17 peóns, o que representa algo máis do 15% do total de falecidos.

Estes datos xustifican por si mesmos a necesidade de actuacións específicas de prevención. Desde as Xefaturas de Tráfico impartiránse charlas nos Concellos, dirixidas a maiores, co fin de concienciar á poboación e incidir naquelas condutas pouco seguras dos peóns, recordando as normas que lles afectan, informándolles para que modifiquen os seus hábitos e reduzan os riscos de ser atropelados. A estas actuacións engadiranse outras campañas específicas como a que se inicia este luns nas estradas galegas.

Desde a Dirección Xeral de Tráfico recordan, ademais, que os peóns que non cumpran a normativa poderán ser denunciados polo non uso da adecuada peza reflectante ou polo incumprimento das obrigacións que os peóns teñen na estrada, fundamentalmente as seguintes:

– Como norma xeral, camiñarán pola esquerda.

– Para atravesar a calzada, cando non hai paso para peóns, deben camiñar perpendicularmente ao eixe desta, non demorarse nin deterse nela sen necesidade e non entorpecer o paso dos demais.

– Usar pezas reflectantes entre o ocaso e a saída do sol.

É necesario recordar tamén aos condutores a obrigación de reducir a velocidade nas zonas en que existan peóns e a recomendación de levar acendidas as luces de cruzamento todo o día, especialmente nesta época de inverno, para facerse visibles a todos os usuarios da vía.