O PSOE de Foz cre que “o Alcalde non é consciente da realidade e dos problemas do concello”

Foz 04/03/2015 Vista a entrevista que recentemente realizaron a Javier Castiñeira, Alcalde de Foz, nun medio local, a Executiva do Partido Socialista quere puntualizar o seguinte:

– O Alcalde de Foz non é consciente da realidade e dos problemas do seu concello, o abandono das instalacións do pobo ou falta de limpeza despois de catro anos de goberno do Partido Popular é visible e palpable para calquera veciño nas beirarrúas, estradas, camiños, edificios municipais, parques infantís, aula da natureza, protectora de animais, estación de autobuses… etc.

– O balance é case exclusivamente de obras virtuais coma o carril bici, ou o porto deportivo; as imaxes que puidemos ver nos últimos días da situación na que se encontran as infraestructuras portuarias falan por si mesmas, un porto sen calado, completamente en seco,os pantaláns tremendamente deteriorados,sen servizo de luz e auga no porto chico, cunha lista de espera de preto de cen persoas, en definitiva un abandono total.

– Un Alcalde despreocupado pola sanidade local, neste mandato Foz perdeu unha ambulancia asistencial para traslados dos enfermos, os servizos médicos precarizáronse en gran medida, non se cobren as baixas dos profesionais sanitarios, o médico de urxencias de tarde non presta o servizo tódolos días da semana e permanece calado ante o desmantelamento do Hospital da Costa.

– Os veciños e veciñas viron como subiron exponencialmente as taxas e os impostos sen que repercutisen nunha mellora dos servizos; un exemplo é a axuda no fogar onde durante todo o seu mandato tan só dúas persoas estiveron ao fronte da mesma e incluso en houbo períodos con un solo traballador no servizo. Da mesma forma que asisten atónitos a ter un Alcalde que non fai mais que repetir que o mantra de que non hai cartos e á vez que deixa sen gastar parte das subvencións concedidas por outras administracións e ten que devolver uns cartos que se poderían dedicar á mellora dos servizos municipais e a contratación de persoal axudando así a diminuír a lacra do desemprego.

-Un Alcalde sen balance, que ten abandonadas as instalacións deportivas, cunha única actuación en todo o mandato, unhas pequenas melloras no campo da cabana, dun elevado custe para a obra realizada.

– Con respecto ao xeriátrico a súa gran obra, todo o mundo pode contemplar o seu estado de retraso, xa que o anterior goberno puxera e deixara os terreos a disposicion da Xunta de Galicia. Ou a depuradora, que despois de anunciar o inmediato desbloqueo da situación, non fixo mais que marear a perdiz e culpabilizar á oposición e non foi quen de investir un solo euro non xa nunha nova senón en tratar de paliar os defectos da existente

– Agora a falta de dous meses para as eleccións ven anunciando obras e melloras que non foi quen de facer en catro anos, afortunadamente os veciños e veciñas de Foz xa non se enganan tan facilmente e saben que estes últimos catro anos foron perdidos para o concello.

– Con respecto ao PSOE e á súa executiva que tanto parece molestalo dicirlle que ás decisións tómanse democraticamente e de forma compartida por todos os militantes, sen que sexa o dedo de ningún cacique o que propón o seu candidato.