Terra Branca e Bis a Bis organizan un magosto na Avenida de Galicia de Ribadeo o 31 de outubro

Ribadeo, 23 de outubro de 2015.- Dous establecementos comerciais da ribadense avenida de Galicia organizan un magosto o próximo 31 de outubro para celebrar o Samaín. Bis a Bis e Terra Branca decoraron os seus escaparates para a ocasión e repartirán castañas asadas a partir das 17.00 horas.

O obxectivo desta acción é humanizar unha das principais arterias comerciais e de tráfico da localidade. José Ramón Leal, de Terra Branca, explica que “a idea xurdiu por unha conservación que tivemos. A medida que nos iamos coñecendo Bis a Bis e Terra Branca entablamos amizade e ademais pensamos que é o momento de dar a coñecer un pouco máis unha rúa que xa é moi coñecida de seu, porque é unha das principais arterias de tráfico da cidade; pero pensamos que hai que darlle ese toque humano que lle falta”. Leal destaca que “queremos aportar ese gran de area organizando un magosto. Entón coincidindo co Samaín pensamos que sería un bo momento para facer algo festivo e entrañable e que poida participar todo o mundo”.

Os propietarios de Terra Branca e Bis a Bis, José Ramón Leal, Nacho Oñate e Mini López-Santos animan ós ribadenses a acudir a esta cita o 31 de outubro e a que os nenos se disfracen. Para crear ambiente decoraron os seus escaparates: “enchémolo todo de teas de araña, de bruxas e dun castelo do terror para que quede todo moi bonito e para que dea moito medo. Gustaríanos que os nenos viñesen disfrazados coas súas cabazas para meternos medo e para facer un magosto inesquecible”, relata Mini López-Santos. José Ramón Leal sinala que “o magosto é unha escusa para estar entre amigos, que é o que queremos”.

Nesta acción colabora panadería La Plaza, que será a encargada de asar as castañas.

Bis a Bis e Terra Branca estudan a posibilidade de realizar novas accións para dinamizar a avenida de Galicia. José Ramón Leal indica que “nós queremos ser unha caixa aberta na que cabo todo o mundo. Neste caso nós estamos uns fronte aos outros, vémonos cada día, temos unha comunicación directa, pero iso non quere dicir que xente que estea un poquiño máis lonxe se poida unir ás festas, ás accións ou ó que se decida en cada momento. Esa é a nosa filosofía, o estar abertos xa non só a esta rúa senón á cidade enteira”.