Son Viveiro responde ao Concelleiro de Facenda pola mocion do alumeado do Nadal

Viveiro, 12 de novembro de 2015.- En SON VIVEIRO, consideramos que é mellor quedarnos en solitario que compartir algúns dos argumentos que expresou o Señor Concelleiro de Economía e Facenda no último pleno de novembro en relación á emenda presentada polo noso Grupo sobre a iluminación do Nadal.

Confundir o alumeado público -de seguridade- coa iluminación de Nadal (decorativa ou festiva) é un grave erro no que incorreu o señor Concelleiro. Parécenos oportuno mencionar isto, dado que na súa intervención nos reprochaba -cun ton lixeiramente fóra de lugar- que a nosa Coalición non se aclaraba na súa posición porque se se situaba, por unha banda, a favor dunha moción sobre a instalación e a reparación da iluminación do paseo de Seiramar a Sacido e, pola outra, a favor da redución da cantidade de iluminación do Nadal.

Con respecto á súa resposta sobre a tarificación “a tanto alzado” do alumeado, todas e todos sabemos que existe e que gran parte da nosa iluminación pública se atopa nesa situación, aínda que non nos pareza a máis correcta tanto por razóns económicas como por motivos ecolóxicos e de xestión eficiente dos recursos.
Tamén coñecemos as rebaixas proporcionadas polas compañías eléctricas ás grandes empresas e somos conscientes de que os refugallos da enerxía, en lugar de ser sufragados polas mesmas, reverten na factura da luz de todos e todos os contribuíntes -suba tras suba-, co cal, finalmente, os custos do consumido en exceso non corre a cargo do Concello, senón á conta de todas e cada unha das persoas que habitan o noso municipio, tanto á daquelas que non teñen problemas para custealos coma á conta das que os teñen e non lles poden facer fronte.

Sorprende que un posto público con dedicación exclusiva remunerada, como é o caso, non elaborase unha resposta máis convincente e meditada, sobre todo porque cando estamos a falar dunha redución no horario da iluminación do Nadal facémolo para evitar tanto a contaminación luminosa como a medioambiental. En cambio, o devandito Concelleiro limitouse a xesticular e non foi capaz de referirse en ningún momento á capa de ozono, ás emisións de dióxido de carbono ou ao efecto invernadoiro. Cremos que se tratou dun lapso momentáneo, pois non dubidamos de que o Sr. Concelleiro de Economía e Facenda é unha persoa que se informa sobre os temas que lle afectan á súa Concellaría malia que daquela nos dese a impresión de máis ben o contrario.