Ciudadanos C´s Ribadeo denuncia a situación de “discrepancia entre as forzas políticas en torno á Residencia de Maiores de Ribadeo”

Ciudadanos C’s Ribadeo aprecian que “nos últimos días aumenta o rifirrafe e a discrepancia entre o Partido Popular por unha banda e o resto de forzas políticas e sociais locais por outro a conto da Residencia de Maiores de Ribadeo”.

Desde a Executiva de C´s Ciudadanos Ribadeo queremos expresar a nosa opinión sobre este tema, xa que consideramos que nos estamos xogando algo demasiado importante para os nosos veciños que nunca se debería converter no “sainete” no que se está convertendo.

“Por encantamento, o PP de Ribadeo cambia de opinión e de súpeto apártase da comisión pro residencia, insisten en que eles si defenden a Residencia de Maiores; pero vanse e miran para outro lado (aos seus xefes de partido que é a quen serven), abandonan a todos os cidadáns do Concello incumprindo claramente coa obrigación de defender os intereses veciñais. Aparece en escena o secretario do Partido Popular de Lugo e Deputado Sr. Balseiro que a modo de xusticieiro vén a esta vila a dictar sentenza en contra do pobo ribadense negando coma se del fose a capacidade toda investimento da Xunta para a Residencia, alzándose como portavoz e protagonista de algo que nin el mesmo o cre xa que para iso está o Sr. José Manuel Rey Varela, Conselleiro de política Social que de momento nada dixo, onde estivo o Sr. Balseiro durante os últimos tres anos e por qué non se expresou así de contundente no mandato pasado cando os anteriores representantes locais do PP si apoiaban a Residencia?. O bo de todo isto é que xa queda menos para as próximas eleccións Autonómicas, posiblemente o mosaico político Galego cambie a mellor e algún terá que preparar as maletas para irse e deixar de vivir do Sistema”.

Desde Ciudadanos C´s consideran que “é lamentable todo isto, vemos que pode perigar un proxecto de interese para todos, estase degradando cada día máis a relación entre Xunta-Concello e non se está facendo o suficiente para evitalo. Xa o dicía Descartes: “non hai nada repartido de modo máis equitativo que a razón: todo o mundo está convencido de ter suficiente”. Por iso cremos firmemente que o único xeito de xuntar e coordinar intereses é a negociación, o diálogo con maiúsculas. Non consideremos traizón ou debilidade o ceder todos un pouco. E si o problema é un informe de viabilidade no que tanto insiste o PP, pois pedimos ao Sr. Alcalde (que por certo, neste caso segue ao pé da letra os consellos dos técnicos municipais – aínda que non sempre é así), faga o ditoso informe, envíeo e a esperar a resposta”.

“Os nosos veciños están necesitados de que os políticos esteamos á altura necesaria para evitar un estrepitoso fracaso e pedimos a todos un esforzo para sacar adiante este proxecto tan importante. Compartimos a idea de que sexa unha Residencia Municipal xa que é polo que se loitou desde un principio. Esiximos que tanto Xunta-PP como Alcalde-BNG defendan unicamente os intereses dos cidadáns aparcando as diferenzas partidistas para que non se faga realidade o vello refrán de “Uns por outros a casa por varrer”.