O Concello de Burela acollerá o vindeiro luns, 2 de maio, unha sesión informativo sobre a proposta da nova regulación en materia de vivendas de uso turístico

A Mariña, 28 de abril de 2016.- O vindeiro luns, 2 de maio, está prevista unha charla informativa, a cargo da Axencia de Turismo de Galicia, para dar a coñecer o borrador do decreto regulador en materia de apartamentos turísticos, vivendas turísticas e vivendas de uso turístico. Este decreto regula unha nova figura: as Vivendas de Uso Turístico, é dicir, aquelas vivendas que se aluguen por períodos curtos (inferior a 30 días).

Como consecuencia da irrupción das novas tecnoloxías no aluguer de vivendas vacacionais ou de temporada, agora denominadas Vivendas de Uso Turístico, as Cortes Xerais do Estado modificaron a Lei de Arrendamentos Urbanos, deixando aberta a regulación dunha competencia exclusiva das Comunidades Autónomas, o alugueiro turístico.
Cataluña, Madrid, Aragón, Canarias e Andalucía xa aprobaron a súa regulación e outras comunidades están preparando o seu regulamento. Galicia participou xunto co resto das CCAA na elaboración dunhas bases homoxéneas sobre as que ordenar a materia.

Esta regulación pretende ofrecer un marco e seguridade xurídica a este tipo de aluguer tanto aos particulares como a todo o sector turístico e unha vez que o texto do decreto foi sometido a información pública de cantas persoas quixeron alegar, así como remitido as entidades representativas do sector, tanto do alugueiro de apartamentos como do sector hoteleiro e tamén sometido ao Consello de Turismo de Galicia con representantes da administración autonómica, corporacións locais, universidade, sector turístico, consumidores e usuarios e sindicatos e recibidas e incorporadas as alegacións e suxestións, o texto finalmente entra na fase final para o seu debate e posterior aprobación.

É por este motivo que Turismo de Galicia está a desenvolver sesións informativas sobre o contido do mesmo con obxecto de dar a coñecer unha futura nova regulación na que a principal novidade é a necesidade de levar a cabo unha sinxela inscrición nun rexistro público.

Esta regulación afecta ás vivendas que se aluguen por períodos curtos (inferior a 30 días), mantendo a regulación mediante a Lei de Arrendamentos Urbanos, no resto dos casos. En todo caso a entrada en vigor está prevista para despois da tempada de verán de 2016.

A sesión celebrarse o vindeiro luns, 2 de maio, no Concello de Burela, ás 19.00 horas, á mesma están citados todos os representantes da Mancomunidade da Mariña Lucense e invítase a asistir a todos aqueles interesados/as e entidades representativas do sector para que poidan plantexar as cuestións e dúbidas que xurdan con respecto á aplicación deste decreto.