Un cento de persoas manifestan o descontento pola situación de Barreiros na asemblea veciñal convocada polo BNG

Barreiros, 6 de xullo de 2017. A asemblea veciñal convocada na tarde noite de onte polo Bloque Nacionalista Galego en Barreiros para valorar a situación do concello e recoller o sentir da veciñanza de cara ao pleno extraordinario que se terá que celebrar tras a solicitude da formación nacionalista reuniu a un cento de persoas que “constataron o que xa imaxinábamos: que hai un malestar inmenso pola deixadez e a mala atención do goberno municipal aos problemas do municipio”, sinala a Portavoz municipal, Ana Ermida.

No desenvolvemento da asemblea sairon temas tan dispares como a situación das praias ou a xestión dos servizos municipais, cada vez máis privatizados e a súa repercusión na economía municipal.

“As persoas que asistiron, que ademais tiveron moita participación, trasladáronnos o seu enfado e tamén a súa decepción por unha situación de abandono xeralizado do concello. Pero tamén insistían moito na falta de alguén que solucione os problemas e que escoite as súas demandas”, explican.

Ana Ermida comprometeuse en nome do BNG a seguir informando á veciñanza. “Estas reunións deberían estar convocadas polo grupo de goberno, que é quen manexa a información e ten a obriga de dar explicacións. Pero se non o fan, facémolo nós. Seguiremos trasladando as nosas posturas, a información que teñamos e dando participación á xente.”

Neste sentido, xa anunciaron a convocatoria de máis asembleas similares á de onte e animaron a todas as persoas presentes onte a acudir ao pleno extraordinario, cuxa convocatoria será publicitada polo BNG, e a mobilizar ao resto de veciñas e veciños para que se faga realidade en Barreiros que o pobo sexa quen máis ordene”, manifestaron.