A Xunta achega 3,8 millóns de euros aos concellos da Mariña lucense a través do fondo de cooperación local

Lugo, 29 de setembro de 2017.- A través do Fondo de Cooperación Local a Xunta de Galicia distribúe, cada ano, un mínimo de 3,8 millóns de euros entre os quince concellos da comarca da Mariña lucense.

Trátase dun plan de inversións que o Goberno galego reparte conforme a criterios obxectivos pactados coa Federación Galega de Municipios (Fegamp) e onde o factor máis relevante é o número de habitantes, pero tamén valora outros como a superficie, o número de persoas maiores de 65 anos e os núcleos de poboación.

A Xunta incrementou este ano a dotación deste Fondo de Cooperación en máis dun 3%, con todo, quedan por repartirse dous millóns de euros adicionais que servirán para incrementar a cifra final que reciben os concellos desta zona.

Respecto á autonomía municipal
O delegado territorial da Xunta en Lugo, José Manuel Balseiro, explicou que unha das principais vantaxes destas axudas é que son os concellos os que, en uso da súa autonomía, deciden o destino dos fondos, isto é as obras, servizos ou gastos ás que orientarán estes recursos.

“Esta característica diferencia o Fondo de Cooperación Local da Xunta doutros programas similares, como pode ser o plan único da Deputación, onde os recursos que recibe cada municipio teñen condicionado o seu destino”

Distribución por comarcas
O delegado territorial explicou tamén que con este e outros apoios, liderados polo Goberno galego, a Xunta demostra que traballa por todos os veciños da provincia por igual, e que se esforza por satisfacer as necesidades de todos os lucenses, vivan onde vivan, con independencia da cor política do seu alcalde”