O Concello de Ribadeo renova a súa adhesión á campaña “En negro contra as violencias”

Ribadeo, 15 de novembro de 2017. O alcalde, Fernando Suárez, asinou esta mañá en Compostela o protocolo de colaboración para o desenvolvemento da campaña En negro contra as violencias na que participan 63 concellos galegos e as Deputacións de Coruña, Pontevedra e Lugo. O rexedor subliñou que “as administración públicas non poden mirar cara outro lado” e lembra que o de Ribadeo foi un dos primeiros concellos en adherirse a esta iniciativa que tinguirá de negro Galicia dentro duns días.
Suárez Barcia dixo: “hoxe tocou vir a Santiago con moito orgullo e moito ánimo por ser un dos primeiros Concellos que xa hai anos botamos a andar con estas iniciativas En Negro Contra As Violencias. A día de hoxe imos asinar un novo protocolo pero ampliando o número destes concellos a 63 e coas Deputacións de Coruña, Lugo e Pontevedra, para seguir traballando nesta lacra que é a violencia de xénero, a violencia contra a muller”.
Para o alcalde de Ribadeo “é unha realidade que non podemos esquecer, nin no noso Concello nin no noso país, non podemos mirar para outro lado as administracións públicas, debemos estar implicadas, e é polo que o Concello de Ribadeo quere seguir estando onde estivo sempre nestes últimos anos”.
Fernando Suárez manifestou que “queremos loitar contra esta realidade estrutural que é a violencia de xénero, que é a expresión máis extrema das desigualdades sociais que viven as mulleres polo feito mesmo de ser mulleres. Unha desigualdade silenciada e agochada, e o que é máis grave, en moitos casos normalizada”.
O rexedor ribadense engade que “por iso hoxe estamos en Santiago para asinar un protocolo de colaboración, para a organización conxunta dunha campaña de sensibilización no marco do día internacional contra a violencia de xénero, que será o vindeiro 25 de novembro, coa denominación En Negro Contra As Violencias”.
Suárez sinalou que “nos marcamos como obxectivos fomentar unha acción de sensibilización cidadá contra as violencias machistas. Queremos tamén implicar a todo o tecido económico, asociativo, educativo, deportivo, social e cultural nunha resposta colectiva de rexeitamento da violencia de xénero e dos asasinatos machistas. Queremos tamén identificar, transmitir e incidir nos comportamentos e nas expresións verbais que están no día a día detrás da violencia de xénero, a través do uso de materiais da campaña específicos por parte da cidadanía nos establecementos comerciais e nos axentes sociais. Todo isto é o motivo da presenza miña hoxe aquí, en Santiago de Compostela”.
Desde a Concellería de Igualdade engaden que “facemos un chamamentos e convite a participar da campaña, a ser axentes activos na loita contra as violencias de xénero e a tinguir de negro o noso Concello. Queremos contar coa implicación de toda a cidadanía e de todos os sectores económicos,sociais e culturais”. Este ano a campaña vai ser do 23 ao 26 de novembro, pero esa mesma semana haberá accións de difusión para incentivar a participación. E haberá un acto o día 24 no Cantón ás 12 horas “para facermos entre todas e todos ese Ribadeo negro”.