Foz, 20 de decembro de 2017. A programación do Concello de Foz para este Nadal inclúe concertos, teatro, danza, a presentación dun libro, unha exposición e as visitas de Papá Noel e dos Reis Magos.
Este xoves, día 21, ás 21 horas na igrexa parroquial de Foz haberá un festival de Nadal a cargo dos conxuntos instrumentais e o coro infantil Peques da Escola de Música focense. Ao día seguinte, o venres 22, ás 20:30 horas e tamén na igrexa parroquial de Foz terá lugar outro festival de Nadal da Escola de Música local, neste caso a cargo dos alumnos de prebanda, coro infantil, coro xuvenil e a orquestra de jazz. Nesa mesma xornada do venres e tamén o sábado 23 haberá unha recollida de cartas dos nenos e nenas para Papá Noel. Para iso os seus elfos estarán na casiña de Papá Noel instalada diante da Casa do Concello de 12:00 a 13:00 horas e tamén percorrerán varias rúas da vila.
O día de Noiteboa, domingo 24, ás doce do mediodía Papá Noel sairá da Casa da Cultura e dirixirase á Casa do Concello, onde recibirá a todos os nenos e nenas. Para poder ir na carroza de Papá Noel os nenos e nenas deberán anotarse no Concello de Foz, concretamente na oficina de Cultura, os días 21 e 22, xa que o número de prazas é limitado. O mesmo día haberá ademais un concerto de panxoliñas na Avenida da Mariña a cargo de alumnos e alumnas da Escola de Música de Foz. Será ás doce do mediodía. Nesa mesma xornada celebrarase tamén a segunda edición da carreira Run Foz Run Nadal, con saída da praza Rosalía de Castro a partir das 16:30 horas.
As actividades continuarán o luns 25, día de Nadal, co tradicional concerto da Banda Municipal de Música de Foz. Será ás 20:30 horas na igrexa parroquial.
O mércores 27 haberá unha representación de teatro musical infantil na Sala Bahía ás 18:30 horas. A compañía Redrun Teatro ofrecerá a obra titulada A nena que quería navegar. O prezo das entradas é de 1,5 euros para os nenos e 2,5 euros para os adultos. O mesmo días ás 20:00 horas na Casa da Cultura presentaranse os libros de Paco Rivas titulados Picaraxadas, brinquedos rimados e Escolma poética.
O sábado 30 ás doce do mediodía na Avenida da Mariña haberá outro concerto de panxoliñas dos alumnos e alumnas da Escola de Música de Foz. Ese mesmo día ás 19:00 horas na Casa da Cultura o Grupo de Teatro Xuvenil Escouridal, de Alfoz e O Valadouro, representará a obra Brancura, escrita por Pepe Peinó. É para todos os públicos con entrada gratuíta.
Xa en xaneiro o día 4, xoves, ás 18:30 horas na Sala Bahía terá lugar un espectáculo de danza dirixido ao público infantil con entrada gratuíta. A compañía Traspediante ofrecerá o espectáculo Baila un vestido verde. Nesa mesma xornada ás 20:30 horas no pavillón do colexio Martínez Otero terá lugar a actividade Patinando en Nadal.
E o venres 5 celebrarase a tradicional Cabalgata de Reis, con saída da praia da Rapadoira ás 19:00 horas para percorrer as rúas da vila ata o belén vivinte que estará na Casa do Concello. Ao remate repartiranse churros con chocolate e roscón de Reis no patio do colexio Número 1, onde tamén haberá inchables para os nenos. Para poder facer o percorrido cos Reis Magos nas carrozas os nenos e nenas interesados deberán anotarse na Delegación de Cultura do Concello de Foz do 2 ao 4 de xaneiro ata cubrir prazas e para participar na cabalgata teñen que ir vestidos de pastores ou co traxe rexional.
Ademais desde o día 15 deste mes ata o 15 de xaneiro o Cenima acolle unha exposición colectiva titulada 20 horas debuxando sobre o papel, con obras de alumnos e alumnas de debuxo da Aula Universitaria da UNED en Foz.
A programación de nadal do Concello de Foz inclúe concertos, teatro, danza, a presentación dun libro, unha exposición e as visitas de Papá Noel e dos reis magos
Relacionado
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
Estiveron acompañados polas dúas técnicas de Xuventude, para gozar dunha mañá nas distintas actividades que ofrece este parque de trampolíns. Pola tarde, o grupo parou a xantar no Lago das Pontes, onde puido coñecer a historia da súa creación e desfrutar dun baño. A viaxe estivo organizada polas Concellerías de Xuventude e Deporte e pola Oficina de Información Xuvenil dentro do programa “Verán a Tope en Xove 2026”.
Evaristo Calvo, Rebeca Montero e Vítor Mosqueira interpretaron o pasaxe que recrea os últimos momentos do Mariscal Pardo de Cela e da súa muller, Isabel de Castro, antes da traizón da Frouseira. A acción cultural, coordinada por Carme Varela e promovida pola Vicepresidencia da Deputación de Lugo, rende homenaxe ao gran dramaturgo do Valadouro no seu primeiro cabodano. 
A Orquesta Mondragón con Javier Gurruchaga á cabeza e Fórmula V con Paco Pastor encheron de lembranzas e de ritmo a noite ribadense. Desde o Concello fan un balance moi positivo do concerto "xa que contribuíu á dinamización económica da nosa vila".
O Campo de Fútbol de As Valgas acolleu as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que pechou unha noite inesquecible.
