O Goberno da Deputación axuda a ser autónomos a 27 lucenses con Síndrome de Down

Lugo, 20 de marzo 2018. O Goberno da Deputación súmase aos actos organizados pola Asociación Síndrome de Down Lugo con motivo do Día Mundial do Síndrome de Down, que se celebra o 21 de marzo, en referencia á triplicación do cromosoma 21, que se traduce na condición xenética desta doenza. Deste xeito, o Executivo Provincial iluminará este mércores de cores azul e amarelo as fachadas do Pazo de San Marcos e do Fogar de Santa María, simbolizando a sensibilidade da institución provincial coas persoas e familias afectadas polo Síndrome de Down. Ademais, a TIC da Deputación elaborou un vídeo promocional, onde se recolle toda a actividade que realiza este colectivo na provincia de Lugo, que se proxecta no mupi de San Marcos.

A Deputada de Benestar e Igualdade, Sonsoles López Izquierdo destacou que “dende o Goberno Provincial traballamos por unha Deputación sumamente social e coas persoas, que defende a igualdade de oportunidades de todos os nosos veciños e veciñas. Por iso, queremos, xunto ás familias de Down Lugo, reivindicar e concienciar á cidadanía sobre as capacidades diferentes que temos todas as persoas por igual”.

O Executivo Provincial colabora coa Asociación Síndrome de Down Lugo cunha achega económica de 12.000 euros para a realización do programa de promoción da autonomía persoal e social co fin de que 27 lucenses con Síndrome de Down teñan unha vida máis independente fóra dos seus fogares. A través deste plan os usuarios, coa axuda de profesionais, aprenden e adquirir habilidades e coñecementos básicos para desenvolverse con autonomía tarefas de ámbito doméstico, como por exemplo facer a compra semanal, cociñar, poñer unha lavadora, etc.

Ademais deste plan, o Goberno da Deputación tamén colabora con Down Lugo no desenvolvemento e promoción de diferentes iniciativas, como campañas de sensibilización na cidadanía ou exposicións fotográficas.

Programación de actividades
A Asociación Síndrome de Down Lugo, coa colaboración do Executivo Provincial, organiza para este vindeiro mércores un percorrido polo centro da capital lucense, que comezará ás 20:30 horas, diante do Pazo de San Marcos, e rematará coa lectura dun manifesto na zona da Mosquera. Fano co obxectivo de visibilizar ás persoas e familias con Síndrome de Down da provincia de Lugo.

Down Lugo
A Asociación Síndrome de Down de Lugo é unha entidade sen ánimo de lucro con ámbito de actuación na provincia de Lugo, que integra a persoas con Síndrome de Down e ás súas familias. O obxectivo principal da asociación é a promoción e realización das actividades que contribúan á mellora da calidade de vida das persoas con Síndrome de Down, a través da súa plena integración social. A Asociación foi creada no ano 1996 por iniciativa dun grupo de pais de persoas con Síndrome de Down, comprometidos coa procura de solucións aos problemas particulares que leva esta discapacidade.