A Concellería de Medio Ambiente inicia na praia do Portelo unha campaña de sensibilización para que os usuarios dos areais os manteñan o máis limpos posible. O eslogan elixido é “Que o que volva ás nosas praias sexas ti”

Burela, 23 de xullo de 2018. A Concellería de Medio Ambiente inicia este luns unha campaña de sensibilización nas praias co obxectivo de que os usuarios manteñan os areais o máis limpos posible.
A edil Noelia Mª Ben explica que “consciente da importancia e necesidade de manter limpo o litoral comezamos hoxe unha campaña de sensibilización nas praias que, baixo o lema Que o que volva ás nosas praias sexas ti, concienciará aos bañistas da necesidade de manter os areais e augas limpas. Con esta campaña lembrarémoslles aos usuarios que deben recoller o lixo que xurda durante a súa xornada de praia, e que teñen á súa disposición nos propios areais distintos contedores para facilitar a reciclaxe dos residuos”.
A concelleira de Medio Ambiente sinala que “esta campaña levarase a cabo en distintas datas ao longo do verán nas praias do noso concello, e serán as monitoras de Gaia as encargadas de explicar a aqueles que se acheguen ao punto informativo as claves dunha correcta separación de residuos, indicando qué tipo de contedor é o axeitado para cada residuo xerado, despexando todas as dúbidas que poidan ter  os usuarios”.
Esta tarde o punto informativo estará situado na praia de Portelo dende as 16:30 ata as 19:00 horas. Noelia Mª Ben engade que “todas as persoas que colaboren cubrindo unha pequena enquisa recibirán un agasallo que lles axudará a manter as praias limpas. Este tipo de campañas de concienciación son moi necesarias e xa pensamos en facer outra proximamente sobre a recollida dos excrementos dos cans, outro dos grandes problemas medio ambientais que detectamos en Burela”.