Nota de prensa
O conselleiro de Educación visitou centros educativos do Concello de Barreiros
* A Consellería investiu no 2010 máis de 20.400 euros en melloras das instalacións e programas educativos dos colexios deste Concello
* Xesús Vázquez Abad achegouse tamén ata o IV Campionato Internacional de Baristas, celebrado no IES de Foz
Barreiros, 15 de febreiro 2011.- O conselleiro de Educación e Ordenación Universitaria, Xesús Vázquez Abad, visitou hoxe os CEIPs de San Miguel de Reinante e de San Cosme, en Barreiros. Así, Vázquez Abad continúa co seu percorrido polos centros de ensino galegos, nos que se achega ás necesidades específicas de cada un deles, co fin de poder darlles unha axeitada resposta.
Ademais, o conselleiro puido comprobar como se están a poñer en práctica nestes colexios os diversos programas educativos innovadores da Consellería de Educación, como as iniciativas de fomento da lectura entre o alumnado, para o que estes centros recibiron un total de 2.300 euros.
Nestas visitas Vázquez Abad estivo acompañado pola delegada da Xunta en Lugo, Raquel Arias; polo xefe territorial da Consellería de Educación na provincia, José Jesús Ramos Ledo; e polas comunidades educativas dos dous colexios.
O titular do departamento educativo da Xunta de Galicia reuniuse cos equipos directivos, docentes e alumnado dos colexios de San Miguel de Reinante e de San Cosme. Vázquez Abad aproveitou a súa visita para comprobar o resultado das obras no parque infantil do CEIP de San Miguel de Reinante, das que se beneficiaron os 62 alumnos do centro. Estes traballos, que supuxeron un investimento por parte da Consellería de máis de 20.400 euros, incluíron ademais a protección dos piares do pavillón do colexio.
Campionato de Baristas
Tras a súa visita a Barreiros, o conselleiro de Educación e desprazouse ata o IES de Foz, onde se está a celebrar o IV Campionato Internacional de Baristas de Escolas de Hostalería 2011, un acto ao que tamén acudiu a subdirectora de orientación profesional e relacións coas empresas, Mª Eugenia Pérez. Paralelamente, mañá celebrarase neste instituto o III Campionato de Baristas Rexión Noroeste da Asociación Europea de Cafés Especiais SCAE España.
Vázquez Abad, estivo presente no desenvolvemento dos exercicios dos participantes, estudantes dos ciclos de grao medio en Cociña e en Servizos, e de grao superior de Restauración, chegados de centros educativos de toda Galicia. O conselleiro quixo amosar así o seu apoio a este certame, que funciona como incentivo para o alumnado e forma de proxección das ensinanzas de hostalaría. Ademais, o campionato crea arredor do alumnado unha contorna de aprendizaxe rica, motivadora e esixente, co fin de conseguir profesionais de calidade con inquedanzas, concienciado de que é precisa unha formación continua para estar ao día de todas as novidades dun sector en constante evolución como é o hostaleiro.
Concurso internacional
Cómpre lembrar ademais que este ano, ademais das comunidades limítrofes de Asturias e Cantabria, o concurso internacionalízase coa participación de Escolas de Hostalería de Portugal. Así, os participantes chegaron dos IES Paseo das Pontes, Fraga do Eume e CIFP Compostela e Escola de Hostalería da Graña (ESENGRA), da provincia da Coruña; os IES de Foz e de Sanxillao, da de Lugo; do IES de Villamarín, na provincia de Ourense; do instituto Peñacastillo, de Santander; do IES de Pravia, en Asturias; e da Escola de Hostalería e Turismo de Viana do Castelo, en Portugal.
Deste xeito, estes campionatos serven para fomentar as relación entre alumnos e profesores dos distintos centros educativos das tres rexións onde se imparten ciclos de FP da familia profesional de Hostalería e Turismo; así como coa comunidade educativa das devanditas escolas portuguesas.
Técnica e creatividade
Os participantes desenvolveron exercicios relacionados coa profesión de barista, especialista na preparación de bebidas a base de expresso – no que atinxe á mestura exacta da presión da auga, temperatura e dose do café- e a creación de bebidas baseadas no café utilizando diferentes tipos de leire, esencias e licores. Estes profesionais ocúpanse ademais do ‘arte do latte’, que consiste en crear deseños, xa sexa co fluxo do leite desde un xarro, ou debuxando cunha especie de punzón enriba da espuma.
Así en 15 minutos os estudantes tiveron que preparar catro Expressos, catro Capuccinos Arte –expresso ao que se lle engade leite emulsionado-; e catro Bebidas Fantasía sen alcol, de creación propia, ás que puideron engadir os ingredientes adicionais desexados. Para iso puideron apoiarse en menaxe diverso, así como en música ao ritmo das que desenrolar os seus exercicios. Os baristas participantes, foron xulgados en aspectos técnicos e creativos por sete xuíces homologados, dous deles técnicos, catro sensoriais e un coordinador, en base ás normas do Campionato Internacional SCAE.
No marco deste certame houbo ademais unha demostración de Latte Art a cargo do considerado como o mellor barista mundial, o italiano Luigi Lupi; o que supón un incentivo e un exemplo para o alumnado.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
