O RESTAURANTE A DORADA DO CANTÁBRICO FOI O GAÑADOR DA SÉTIMA EDICIÓN DO RIBADEO DE TAPEO QUE CONCLUIU ONTE. SUÁREZ BARCIA AMÓSASE SATISFEITO POLO ÉXITO DESTE CONCURSO GASTRONÓMICO NO QUE DURANTE 10 DÍAS SE VENDERON ARREDOR DE 50.000 TAPAS.
Ribadeo, 28 de maio de 2012. O restaurante A Dorada do Cantábrico foi o gañador da sétima edición do Ribadeo de tapeo. O xurado que degustou as 51 tapas presentadas a concurso así o decidiu. O segundo premio foi para La Solana e o terceiro para o Kursal. O alcalde, Fernando Suárez Barcia, amosóuse moi satisfeito do éxito desta tradicional cita que trouxo a centos de persoas a Ribadeo. Segundo os datos que manexa o Concello en dez días vendéronse arredor de 50.000 tapas.
O rexedor dixo que “todas as cousas boas tamén teñen o seu remate, pero neste caso con moita satisfacción vemos que na sétima edición do Ribadeo de tapeo se venderon unhas 50.000 tapas, elaboradas polos 51 establecementos participantes, e onde debo destacar o enorme ambiente que se viviu en Ribadeo ao longo destes dez días. E iso é o que pretendemos desde o Concello organizando esta iniciativa que ten tanto éxito, que tantos outros Concellos de cerca e de lonxe veñen ver aquí o que nós facemos para implántalo nas súas zonas. Pero nós cada ano intentamos mellorar, intentamos facer máis cousas anexas, como puido ser a ruta das tapas das alcantarillas, que estivo francamente ben, ou as outras iniciativas culturais realizadas arredor do Ribadeo de tapeo”.
Suárez Barcia indicou que “aínda que, como sempre digo, o importante é participar, tamén aquí establecemos uns premios aos que mellor o fixeron, aos que se máis de esforzaron, a través dun xurado independente do propio Concello e formado por especialistas na restauración, aos que eu lles quero agradecer o seu traballo ao longo destes días”. Ese xurado determinou 10 finalistas que foron: AG Porcillán, Bouza, O Cabás, Casa Pepe, A Dorada do Cantábrico, Casa Foguete, Kursal, Náutico, Parador de Turismo e La Solana. “E dentro destes finalistas o terceiro premio foi para a sala Kursal pola súa tapa Da batea á lata, o segundo premio foi para La Solana polo seu Libriño das letras galegas, e finalmente o premio gañador desta sétima edición do Ribadeo de tapeo foi A Dorada do Cantábrico polo seu Rolo de tenreira con verduriñas e puré de pistachos en salsa agridoce”, explicou o alcalde de Ribadeo, que engadiu que “dentro duns días será cando fagamos o resumo e o reconto do que será o premio do público á mellor tapa e onde sorteemos os premios ao larpeiro de ouro e os outros que tamén damos habitualmente”.
Outros eventos
Barcia subliñou que “estas iniciativas que levamos adiante desde o Concello tratan, sobre todo, de crear ambiente para traer xente a Ribadeo, para que o sector servizos e a hostalería se poidan beneficiar de toda a xente que se achega ata aquí”. E tamén aludiu e destacou “o traballo realizado polo asociacionismo deportivo que está facendo a Ribadeo grande, grande porque esta fin de semana houbo un torneo de veteranos que trouxo aproximadamente a 1.000 persoas a Ribadeo con xentes de Galicia, do resto de estado e incluso dalgún equipo inglés. O traballo que fan estes veteranos é moi importante para a economía de Ribadeo como os que farán tamén nas vindeiras semanas a SD Ribadeo, o fútbol sala, a ximnasia rítmica, que van realizar diferentes eventos ao longo das vindeiras fins de semana e que van traer a centos de persoas a Ribadeo facendo que os hostais, os hoteis, os restaurantes e os comercios sexan tamén directamente beneficiarios e é lóxico e xusto que o Concello siga apoiando estas iniciativas para ben de Ribadeo”.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
