O goberno de Cervo responde á oposición con descualificación e sen achegar argumentos

O goberno local di que o PSOE esfórzase máis en dar a impresión de que traballa que de traballar de verdade

Cervo, 29 de agosto de 2012-O goberno de Cervo respondeu hoxe ás declaracións feitas polo grupo municipal socialista nas que explica por qué non presentou alegacións aos orzamentos a pesar de ter anunciado que as faría. Para o executivo local, “o único obxectivo do PSOE é dar a impresión de que traballa, por iso, unha semana despois de terse celebrado o pleno anunciou na prensa que presentaría alegacións. Pero pasado o prazo, non rexistraron ningunha reclamación, polo que temos que entender que simplemente lles preocupaba dar imaxe de traballo e esforzo e, unha vez que xa saíron nos medios, desenténdense de todo e esquecen a última fase, pero tamén a máis importante: a de traballar” asegura a edil de Facenda, Tania González.

A concelleira rexeita por completo o argumento dos socialistas para explicar a ausencia de alegacións. “O PSOE de Cervo non quere que a veciñanza se dea conta de que prometeron que ían facer algo e ao final non fixeron nada, e por iso se escudan en criticar ao goberno. Esa é a súa estratexia” explica González. “Os socialistas din que non reclamaron os orzamentos porque o goberno non as ía aceptar pero, entón, por que anunciaron que presentarían alegacións unha semana despois de que se aprobaran os orzamentos cando non tiñan ningunha intención de facelo?” engade a edil.

Aínda así, a delegada de Facenda advirte aos socialistas de que “basear a súa labor de oposición en espellismos e en impresións que nunca se traducen en traballo no beneficio dos cervenses ten moitos perigos” e por iso lembra, unha vez máis, “que o que a veciñanza precisa ver é traballo, esforzo, resultados e investimentos reais”. Para González “podían facer moito por Cervo dende a administración provincial na que gobernan, pero “cando se trata de traballar, iso que tanto lles asusta, teñen moito que demostrar”

A edil asegura que todas as declaracións dos socialistas están “cortadas polo mesmo patrón”. González explica que “a táctica do PSOE é facer sempre o contrario do que din. Cando se lles convoca a actos municipais non acoden, e cando non se lles convoca, quéixanse. Agora utilizan a mesma estratexia. Din que presentarán alegacións aos orzamentos, e non as presentan. E cando llelo lembramos, bótannos a culpa a nós”.