Os populares coinciden cos médicos en que o Hospital da Costa atende ao 98 por cento dos pacientes que precisan de ingreso

O Partido Popular da Mariña lucense coincide cos médicos do Hospital da Costa que hoxe confirmaban que o 98% dos pacientes que precisan de ingreso son tratados no centro hospitalario con sede en Burela. Esta circunstancia vén a corroborar os datos que o Partido Popular vén defendendo nos últimos anos que testemuñan que só o 2% dos pacientes son desprazados a outros hospitais e, en consecuencia, a desmentir as afirmacións falsas que facían PSOE, BNG e a Plataforma Sanitaria en relación con este tema.

PUNTO DE ENCONTRO: AMPLIACIÓN

Os populares tamén amosan a súa satisfacción polo punto de encontro entre o SERGAS e as declaracións ofrecidas polos facultativos nas que coinciden en sinalar que o actual centro hospitalario de Burela se queda pequeno e, en consecuencia, respaldan a decisión do actual Goberno da Xunta de ampliar o Hospital da Costa. Lembremos que o pasado mes, co aval do Consello da Xunta, o Diario Oficial de Galicia publicaba a licitación do Plan Director do Hospital, feito para o que destinaba 143.000 euros. A ampliación é ademais garantía do mantemento en calidade suficiente da sanidade pública da Mariña.

Os populares subiñan que na actualidade o Hospital da Costa ten capacidade suficiente para manter como mínimo a mesma cobertura de asistencia aos pacientes da que dispón na actualidade –atende o 98% dos casos- e que esta capacidade se verá incluso incrementada coa ampliación. De feito, o proxecto posto en marcha polo Goberno de Feijóo busca manter os actuais servizos e incluso amplialos, con novas dotacións.

INCOMPARABLE

Desde o Partido Popular consideran que non é acertado comparar a actividade de quirófanos do Hospital da Costa con hospitais comarcais como os de Cee, Monforte ou O Barco xa que estes últimos atenden a unha poboación, en moitos casos, de menos da metade dos que hai na comarca da Mariña lucense. As referencias que desde o PP fixeron aos hospitais comarcais nos que xa se aplica a área de xestión integrada era co único obxecto de demostrar que alí non se perderon ningún tipo de servizos ou consultas, ao contrario, gañaron novos servizos.

MÁIS COMPETENCIA E CAPACIDADE DE DECISIÓN

Finalmente desde o Partido Popular non poden coincidir con que asegura que o Hospital de Lugo absorberá ao de Burela. O Hospital da Costa continuará con plena actividade e con todos os seus servizos, nunca desaparecerá ou pechará e ademais dispón, logo da aprobación do novo Decreto de xestión, dun xerente executivo con máis funciones (agora tamén dirixe os centros de saúde) e con capacidade de decisión.