Os socialistas advirten que os retrasos nos pagos da Xunta ás confrarías fai “insostible” a súa situación financeira

José Ramón Val critica que a Xunta “mire para outro lado” diante da situación dos pósitos

Pregunta no Parlamento pola situación da confraría de Baiona, que acumula débedas de 53.000 euros e perde 4.500 euros mensuais en gasto corrente

Santiago de Compostela, 04 de abril de 13. O portavoz de Pesca do Grupo Socialista, José Ramón Val, advertiu hoxe que os retrasos nos pagos da Xunta ás confrarías galegas fai “insostible” a situación financeira destes órganos. Val presentou unha pregunta na Comisión de Pesca celebrada hoxe sobre a situación dos pósitos galegos a partir do caso concreto de Baiona, con débeda de mais de 53.000 euros e unhas perdas mensuais de 4.500 euros de gasto corrente.

Val criticou que o goberno galego “mira para outro lado” diante da difícil situación destes entes, asfixiados pola baixada de ingresos, que provoca a acumulación de débedas, o que á súa vez vese agravado polos impagos das administracións e “aboca a unha situación de alarma”. Sinalou que o goberno “debe ser quen fiscalice e ser coñecedor da situación real” das confrarías galegas.

Lamentou que malia os compromisos asumidos polo goberno de Feijóo o para actualizar as súas débedas a 15 de agosto do ano pasado, a realidade é que “vai facer un ano e aínda non fixeron os pagos”. Esta actitude, dixo, aboca a moitas confrarías a unha situación financeira insostible e lembrou que o goberno galego “ten mecanismos para poñer enriba da mesa” para axudar ás confrarías pagando con maior celeridade.

O parlamentario socialista advertiu que mentres a Xunta comprométese a realizar os pagos a realidade é que os retrasos nos pagamentos “obrigan á xente a traballar sen cobrar e as confrarías endebédanse ata límites insospeitados”, provocando EREs e despedimentos.

Renovación
José Ramón Val animou ao goberno galego a encetar o proceso de renovación das confrarías galegas, e lembrou que a Xunta acumula xa un retraso de medio ano para comezar a cambiar ás directivas dos pósitos.

O portavoz de Pesca considerou “importante que a Xunta clarexe a situación” destes entes e “si consideran viable garantir a súa continuidade” así como as medidas concretas a levar a cabo para resolver a súa situación financeira.