O Burela FSF ofreceralle a Copa de España á Virxe do Carme

Burela, 30 de maio de 2013. O Burela Fútbol Sala ofreceralle a Copa de España á Virxe do Carme. O acto terá lugar ao inicio da misa que se celebrará o sábado na igrexa parroquial. Xogadoras e corpo técnico acompañarán á Virxe do Carme na súa procesión ata o peirao, segundo anunciaban este mediodía en rolda de prensa o alcalde, José Mª González Barcia, a comisión de festas e o propio club.

O rexedor relatou que “o Burela Fútbol Sala Feminino vaille ofrecer a Copa de España acadada o pasado domingo en Bilbao á Virxe do Carme aproveitando as festas patronais que Burela vive de forma intensa e que de maneira máis intensa aínda vivirá durante esta fin de semana. O acto vai ter lugar ao inicio da misa que se vai celebrar este sábado na igrexa parroquial e está previsto que tanto as xogadoras coma o corpo técnico acompañen á Virxe do Carme na súa procesión ata o peirao”.

Para González Barcia “isto ten un enorme significado e eu valoro de forma moi positiva que o equipo feminino do Burela Fútbol Sala lle faga esta ofrenda á Virxe por unha razón fundamental, porque a Virxe é a patroa de tódolos cidadáns deste concello. Eu entendo que é unha boa forma de que a través desta ofrenda haxa unha vinculación máis estreita aínda entre o equipo feminino do Burela Fútbol Sala e o pobo de Burela”. E amosouse convencido “de que estou expresando o sentir maioritario dos veciños e veciñas do noso concello, que un dos acontecementos máis importantes que temos vivido non soamente no ámbito deportivo senón no ámbito social polo que ten de repercusión mediática e de enxalzamento e de darlle pulo ao nome de Burela é que o equipo do Burela Fútbol Sala Feminino teña acadado a liga da División de Honra e a Copa de España na súa máxima categoría”.

O alcalde de Burela valora de forma moi positiva “o xesto que teñen as xogadoras, que ten o club, de facer esta ofrenda á Virxe do Carme deste éxito, que foi conseguido grazas á aplicación práctica dos valores do esforzo, do traballo individual e en equipo, do respecto mutuo, etcétera. Son valores que tanto identifican tamén ao pobo de Burela. Moitas grazas ao Burela Fútbol Sala Feminino no nome de tódolos veciños do noso concello. E nese sentido hoxe na sesión ordinaria do pleno que se celebrou aquí, na Casa do Concello, pola mañá tal e como estaba previsto acordamos por unanimidade de tódolos presentes, a totalidade da Corporación Municipal, concederlle a medalla de ouro do Concello ao Burela FSF”.

José Mª González Barcia sinalou que “o acto de entrega da medalla de ouro xa se está perfilando, estamos en permanente contacto desde o Concello coa directiva do Burela FS para facer un acto que represente a sinxeleza do noso tempo, pero que ao mesmo tempo teña a solemnidade precisa para remarcar esta maior vinculación, aínda si cabe, entre o pobo de Burela e o Burela Fútbol Sala Feminino”.