A Mariña, 27 de agosto de 2014.- Desde o BNG condenan, unha vez máis, os casos de violencia machista que se rexistraron no noso país nos últimos días. Ao asasinato dunha muller en Barro hai dous días, hai que sumar hoxe a muller ferida en Chantada con un disparo na cabeza a mans da súa parella. Desde o BNG envían o seu apoio á familia das vítimas e desexan a recuperación da muller ferida en Chantada, á vez que piden contundencia á hora de condenar estas actuacións e solicitan medidas de loita contra a violencia machista que vaian máis aló de condolencias e actos simbólicos.
A responsable comarcal nacionalista, Ana Ermida, asegura que “ten que ser unha prioridade política acabar con esta lacra que sega cada ano ducias de vidas de mulleres polo feito de selo. Á vista está que o continuo recorte nos servizos que se ofrecen ás vítimas e as chamadas á denuncia non funcionan, xa que as mulleres están cada día máis desprotexidas. É preciso unha política integral que faga fronte á discriminación contra as mulleres que ten a súa cara máis dramática nos asasinatos machistas.”
Para a formación frontista, “máis aló das mostras de rexeitamento que poida haber en situacións concretas, os poderes públicos deben combater cos medios adecuados a violencia machista; incrementando os recursos materiais e persoais na loita contra a violencia e promovendo a coeducación e a discriminación da vida pública para tentar unha sociedade sen violencia e en igualdade entre homes e mulleres.”
Concentración o sábado 30, ás 12:00h, na Praza dos Campos en San Cibrao
O BNG chama novamente á sociedade mariñá a amosar o seu rexeitamento á violencia machista nun acto que terá lugar o sábado, ás 12h, na Praza dos Campos en San Cibrao.
“A comarca da Mariña xa ten amosado noutras ocasións que responde con contundencia ante casos deste tipo que, neste ano, tamén se deron na nosa comarca segando a vida de tres mulleres”, aseguran desde o BNG. Precisamente, o feito de que a convocatoria se faga no concello de Cervo, resposta á intención de recordar ás dúas mulleres que foron asasinadas nese concello, ao igual que se fixera na anterior ocasión no concello de Foz.
A xeito simbólico durante a concentración o BNG desenvolverá unha actuación no recordo das mulleres asasinadas en Galiza no que vai de ano.