Apretada clasificación na Liga Sénior da XXVII Tirada de Bolos de Xove

Aprétase a clasificación na cabeza da Liga Sénior Masculina da XXVII TIRADA DE BOLOS de Xove. A vitoria de Sócrates Campo acorta a distancia a só 2 puntos do líder, que nesta ocasión non puido pasar do sétimo posto, rompendo dalgunha maneira a regularidade que viña mantendo. Por detrás, Francisco Pérez (31 puntos) e Moisés Rodríguez (30 pts) mantéñense á expectativa, xunto cun numeroso grupo de perseguidores con máis de 20 puntos. Polo tanto, pasado un terzo da competición, destaca a igualdade na clasificación que axuda a manter un alto nivel competitivo no mesmo.

Liga Sénior Feminina
Belén Meitín conseguiu superar á líder Salomé Cardoso nesta tirada, restándolle un punto na clasificación, co que aínda mantén a primemira posición cunha cómoda vantaxe de 9 puntos (33 por 24).

Na terceira posición atópase a veterana Salomé Bermúdez, que con 15 puntos estase a destacar por enriba de Carmen Roca, unha das grandes favoritas que, nestes intres, está arrostrando problemas físicos que lle impiden competir a un nivel normal.

Liga Sub 16
Poucas novidades na categoría Sub 16. Cunha vitoria máis, pleno polo momento, de Daniel Alonso. Miguel López sigue instalado cómodo na segunda posición, sen ninguén que o inquiete; pero sen inquietar tampouco el mesmo ó líder. Onde se presume unha loita nesta categoría é polo terceiro posto para o que Javier Alonso parte con vantaxe, seguido de Julia López e Hugo Péres.

A vindeira tirada terá lugar no CENTRO SOCIAL DE VILACHÁ, o vindeiro SÁBADO, 14 DE NOVEMBRO DE 2015.