A Renovación das portas e ventás da Casa do Concello permitirá mellorar a eficiencia enerxética do edificio que ten case 30 anos de antigüidade

Cervo, 26 de outubro de 2017.- A Casa do Concello de Cervo está estes día en obras para renovar as portas e ventás do edificio que ten case 30 anos de antigüidade, e que, tal e como apuntou o rexedor Alfonso Villares, precisaba desta actuación porque “o illamento térmico era moi baixo, e coa substitución da carpintería exterior lograremos mellorar notablemente a eficiencia enerxética do edificio; ao tempo que acondicionamos as oficinas para que o persoal municipal dispoña dun ambiente de traballo máis confortable, evitando eses contrastes bruscos de temperatura que existían ata o de agora”.
Villares sinalou que o orzamento ascende a 59.532 euros, procedentes da Consellería de Presidencia da Xunta de Galicia “a quen agradecemos a inversión” e recordou que vai uns meses o propio Vicepresidente, Alfonso Rueda, desprazouse ata Cervo, onde, ademais de supervisar outras obras, “percorreu as instalacións municipais e puido coñecer de primeira man as necesidades existentes”.
O rexedor recordou que é moi importante para nós manter todos os edificios municipais en bo estado e sinalou que é moita a inversión que hai que facer para o seu acondicionamento, porque ademais son moitos os que temos por todo o Concello, pero “sobre iso estamos a traballar, mobilizando cantidades importantes de diñeiro e buscando financiamento para ese fin”.