Mozos e mozas de Down Lugo compartiron co alumnado do CEIP Cervo nº1 a súa experiencia no proxecto fotográfico Enfocando Historias, que se pode visitar na Casa da Cultura ata o 28 de xuño

Cervo, 16 de xuño de 2018. Varios mozos e mozas de Down Lugo pasaron unha mañá co alumnado do CEIP Cervo nº1, de San Ciprián, na que compartiron a súa experiencia no proxecto fotográfico Enfocando Historias, que se pode visitar na sala de exposicións da Casa da Cultura, ata o 28 de xuño.
Fátima Rosón, Marcos Cruz, Saúl Montoya e Carla Pereira foron os encargados de describir o gratificante da experiencia a través da proxección de diferentes diapositivas e contaron como é o seu día a día, a súa loita por acadar a plena inclusión, por atopar un oco no mercado laboral para o que se están capacitando e formando.
O proxecto desenvolveuse en catro fases. Primeiro os participantes recibiron clases teóricas para familiarizarse con conceptos básicos de fotografía e comezaron coa labor de idear historias. A segunda fase foi unha viaxe realizada á Mariña e á Praia de Penarronda (Asturias) para plasmar en instantáneas esas historias. A terceira adicouse a seleccionar fotografías e ao tratamento das mesmas con diferentes programas. E a última é a de compartir con todos nós o resultado deste traballo que fora exposto ata o de agora tan só na Capela de Santa María de Lugo.
A edil de Cultura e Educación, Dolores García Caramés, que estivo presente neste acto, encomiou o gran traballo dos rapaces de Down Lugo, e apuntou que “desde Cervo sempre estamos dispostos a colaborar en iniciativas coma esta, tan enriquecedoras, e que contribúen a logran a integración total deste colectivo, un obxectivo que debe ser unha prioridade e unha responsabilidade de todos e todas”.