A Vicepresidencia da Deputación distribúe libros arredor de Xela Arias a 140 centros educativos

Lugo, 12 de maio de 2021. Durante esta semana, a Vicepresidencia da Deputación de Lugo está facendo chegar aos centros educativos un lote de libros con diferentes publicacións arredor de Xela Arias. En total, 140 colexios e institutos reciben nestes días a partida de libros, coincidindo coa homenaxe a autora polas Letras Galegas.

Aos colexios da provincia remitiuse cadanseu exemplar de “Non te amola”, unha recompilación de relatos escritos pola escritora sarriá recollendo vivencias da infancia que permaneceron inéditos ata a súa publicación este ano pola Editorial Galaxia, con ilustracións de Luz Beloso; “Intempestiva”, unha biografía literaria de Xela Arias escrita pola profesora da USC e crítica literaria Montse Pena; e “Xela quixo ser ela”, un estudo en clave biográfica asinado por Yolanda Castaño que indaga nas orixes do carácter anovador e feminista da súa obra.

No caso dos centros de secundaria, o lote inclúe tamén “Poesía reunida (1982-2004). Xela Arias”, un volume que recolle a obra poética da autora nese periodo vital, con edición e notas de María Xesús Nogueira.

A vicepresidenta da Deputación de Lugo, Maite Ferreiro, explicou que “se trata de exemplares adquiridos polo Servizo de Publicacións co obxectivo de apoiar a produción editorial en galego, especialmente, neste ano, os títulos vencellados ao estudo de Xela Arias”.

“Con este reparto aos centros educativos, cumprimos co obxectivo fundamental destas publicacións que é chegar ao público e divulgar a vida e a obra da poeta e ofrecemos ao ensino recursos que consideramos de interese para traballar sobre a figura da autora. É tamén unha forma de agradecer á comunidade educativa o interese que poñen na celebración dunha data fundamental para a lingua e a cultura galega”, argumentou.

“Cremos que é un catálogo completo na medida en que se mestura a obra da autora, co volume sobre a súa obra poética e a publicación “Non te amola”, con textos que escribiu nos anos 90, con outras dúas obras que se achegan a ela cunha perspectiva biográfica”, sinalou Maite Ferreiro sobre a composición do lote de libros.

Mañá, nova entrega de “Outras voces para as letras de Xela”

A distribución dos libros aos centros de ensino forma parte das actividades organizadas pola Vicepresidencia da Deputación de Lugo para homenaxear a Xela Arias no seu ano. Entre elas, a exposición itinerante “Xela Arias. A poesía do retrato”, que permanecerá nas rúas de Sarria ata o vindeiro 20 de maio, e a serie “Outras voces para as letras de Xela”, con quince pezas audiovisuais nas que a obra da poeta pasa pola voz, performance e reflexións biográficas de escritores e escritoras, artistas, familiares e persoas anónimas.

Mañá xoves, ás 20.30 horas, difundirase un novo episodio nas redes sociais e na canle de Youtube da Vicepresidencia da Deputación de Lugo coa intervención do alumnado do Val do Asma de Chantada.