Lugo, 7 de outubro de 2021. A deputada de Medio Rural, Mar e Mocidade, Mónica Freire, presentou esta mañá a segunda edición do programa “O que non arde”, dirixido a contribuír á prevención e defensa contra os incendios forestais e a apoiar a xestión integral dos montes.
Na anualidade 2021, o plan oriéntase ao fomento das actividades de silvicultura nas comunidades de montes veciñais en man común (CMVMC) a fin de reducir a elevada cantidade de biomasa existente nos montes e aminorar o risco de lumes asociado.
Así, a área de Medio Rural puxo en marcha unha convocatoria dirixida ás comunidades de montes veciñais en man común, que poden solicitar a axudas en dous ámbitos:
-para a promoción de actividades silvopastorís con gandeiría extensiva no ámbito de influencia das redes secundarias de faixas de xestión de biomasa así como nas faixas laterais das redes viarias de titularidade municipal situadas dentro dos límites das terras que xestionan.
-para a elaboración, por parte dun técnico competente, dun plan de aproveitamento silvopastoril, para a regulación de dito aproveitamento e a inscrición no rexistro público de terreos forestais de pastoreo, ou para a súa inclusión dentro dun proxecto de ordenación.
Ademais, aqueles solicitantes de axudas enmarcadas nalgunhas das actuacións incluídas nos dous eixos anteriores poderán solicitar axudas destinadas á investigación da propiedade, resolución de discrepancias catastrais, e outras de natureza semellante que repercutan na mellora organizativa e estrutural da CMVMC, no senso de contribuír á elaboración exacta da planimetría destinada á determinación dos límites do monte comunal.
A deputada de Medio Rural explicou que “con esta segunda edición do programa damos continuidade a unha liña de traballo que puxemos en marcha na anualidade pasada coa vontade de contribuír á prevención dos incendios”
“O éxito e a acollida da primeira edición, co labor pedagóxico levado a cabo na idea de ordenación dos espazos agroforestais, levounos a darlle continuidade e orientalo, nesta anualidade, ao fomento de actividades de silvopastoreo que contribúan a reducir o risco de lumes pola elevada cantidade de biomasa existente nos nosos montes”, continuou a deputada nacionalista.
Mónica Freire incidiu en que “o programa “O que non arde” aborda a problemática dos lumes desde o ámbito da prevención, poñendo o acento na planificación e na ordenación dos espazos forestais e atendendo ás necesidades que nos formularon desde as comunidades de montes veciñais en man común, axentes fundamentais no desenvolvemento económico e produtivo do rural”
Beneficiarios e prazos
Poderán ser beneficiarias das ditas axudas as CMVMC da provincia de Lugo cuxos montes estean inscritos no Rexistro Xeral de Montes Veciñais en Man Común, e que velen pola defensa contra os incendios forestais mediante o aproveitamento do monte con pastoreo en extensivo de xeito que se contribúa á diminución da cantidade de biomasa existente nas faixas secundarias e/ou laterais das vías de titularidade municipal.
No caso de arrendamento total ou parcial do monte, ou cesión parcial do mesmo para o seu aproveitamento individual por parte dalgúns comuneiros, para a realización dun aproveitamento de pastos por gando en extensivo, os arrendatarios e comuneiros poderán acollerse ao programa.
As axudas, convocadas en réxime de concorrencia competitiva e cun orzamento total de 60.000 euros, poden solicitarse ata o vindeiro 28 de outubro, dacordo coas indicacións recollidas nas bases da convocatoria, dispoñibles na web da Deputación de Lugo e publicadas no BOP do 29 de setembro.
Montes veciñais en man común
Os montes veciñais en man común son unha das poucas formas de propiedade e xestión en común da terra que puido sobrevivir á organización municipal do século XIX e ao fenómeno desamortizador, constituíndose como forma de propiedade característica de Galiza.
A cuarta parte do territorio galego, máis de 700.000 hectáreas, corresponde a monte veciñal en man común xestionado por 2.800 comunidades de montes. No que se refire á provincia de Lugo, segundo datos de 2016, a superficie xestionada por comunidades de montes é de 205.600 has. e no rexistro figuran 924 comunidades.
Alén das cifras referidas ás comunidades de montes, significativas da importancia desta figura no desenvolvemento económico e produtivo, en Galiza ten unha especial relevancia o aspecto económico dos montes, ao ter as actividades levadas a cabo nos mesmos un carácter estratéxico para o desenvolvemento do medio rural, tendo en conta que aproximadamente o 50% da produción forestal do estado se extrae dos montes galegos, e ao ser unha importante base
territorial para o desenvolvemento da gandería extensiva.
Programa pioneiro
“O que non arde´” é o primeiro programa impulsado pola Deputación de Lugo en relación coa prevención de incendios e a xestión integral do monte. Trátase, segundo explicou Mónica Freire, “ dunha iniciativa pioneira e prioritaria dentro das liñas de traballo que se desenvolven ao longo da lexislatura desde a nosa área de Medio Rural, por contribuír de xeito activo ao fomento do desenvolvemento económico e social, á planificación do territorio provincial, e á fixación de poboación nas zonas rurais”
Na súa primeira edición, en 2020, o programa implementouse a través da colaboración cos concellos, que puideron solicitar axudas de Medio Rural para a roza e limpeza das faixas laterais da rede viaria municipal, así como para o mantemento da rede de faixas de xestión de biomasa coa plantación de especies arbóreas autóctonas.
A representación terá lugar este sábado día 18, ás 19:30 horas, no local social da Asociación de Veciños de Marzán, un dos destinos habituais nas xiras anuais da compañía. O Centiño mantén así a tradición de visitar este espazo, onde agarda compartir co público unha tarde divertida e chea de humor. A agrupación teatral continúa así coa difusión da súa nova obra, que segue a percorrer diferentes escenarios da comarca.
Dezaoito locais hostaleiros de Ribadeo, Rinlo e Vilaframil ofrecerán diversas preparacións ata o vindeiro domingo: en escabeche, en salpicón, en empanada, ao allo, á prancha, en albóndega, etc… Todas as propostas poden consultarse nas redes sociais de Acisa Ribadeo, que agradece “unha vez máis o apoio da OPP do Porto de Burela, que nos doou 90 quilos de cabala para estas xornadas, produto que entregamos de xeito gratuíto aos locais participantes. Achegámoslles así unha parte do peixe que empregarán nesta nova cita gastronómica na que tamén colabora o Concello de Ribadeo”. Ata o porto, ao restaurante Marinero, se achegaron este mediodía o director territorial da Consellería de Mar, Alexandre Piñeiro, as concelleiras ribadenses Montse Seijo, Elena Sierra e Begoña Sanjurjo, a presidenta de Acisa, Carmen Cruzado, o xerente do colectivo empresarial, Jesús Pérez, e o técnico de Acisa, Jorge Fernández, que puideron degustar as elaboracións realizadas por este establecemento hostaleiro.
Durante a xornada Lionel compartirá a súa experiencia no mundo da escrita, dando a coñecer os seus procesos creativos e as temáticas que caracterizan os seus libros. O acto incluirá un coloquio participativo cos asistentes do club onde poderán preguntar e intercambiar opinións co autor sobre o libro lido “A raíña das velutinas”.
O sábado terá lugar no Casino o III Showcooking, con cociña en directo e maridaxe de viños. O público poderá votar os seus pinchos favoritos e participar no sorteo dunha noite no hotel Marqués de Riscal. A entrega de premios será o luns 20 ás 19:00 h. O Concello e Destino Navia animan a veciños e visitantes a gozar desta cita gastronómica.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
As persoas interesadas poden anotarse ata o 24 de abril na Casa do Concello (Cervo) ou na Casa da Cultura (San Cibrao). A actividade está dirixida a persoas pensionistas empadroadas no municipio. Trátase dunha xornada pensada para compartir, celebrar e desfrutar en comunidade.
