A alcaldesa pon en valor o traballo e a profesionalidade dos efectivos do GES e insiste na idea de que quere manter o servizo, pero advirte que, nas condicións actuais, é inviable para un pequeno municipio, en especial, cando ten que asumir a carga de traballo dos parques de bombeiros de Viveiro e Barreiros en situación de inactividade efectiva
Cervo, 29 de novembro de 2024. A alcaldesa, Dolores García Caramés, vén de remitir por segunda vez un escrito á Deputación de Lugo no que reclama que, como administración competente no ámbito da protección civil, se implique nunha solución para que o Grupo de Emerxencias Supramunicipais (GES) con base en Cervo, e operatividade en toda a comarca, poida continuar coa prestación deste servizo público en termos de eficiencia, seguridade e saúde laboral.
A alcaldesa pon en valor o traballo e a profesionalidade dos efectivos do GES, pero advirte á Deputación que, nas condicións actuais, manter este servizo é inviable desde o punto de vista técnico e económico para un pequeno municipio como Cervo, en especial, cando ten que asumir gran parte da carga de traballo dos parques de bombeiros de Viveiro e Barreiros, en situación de práctica inactividade.
A xestión do GES vólvese especialmente complicada nos períodos de vacacións e baixas laborais dos seus membros, ata o punto que a Alcaldía se viu obrigada a prohibir aos seus efectivos acudir a saídas de emerxencia cando se atope de servizo tan só un membro do equipo. Polas características especiais das actuacións que se executan por parte dos traballadores do GES, resulta necesario que nas mesmas participen como mínimo tres efectivos, para dar cumprimento á lei de riscos laborais RPRL. Co persoal habitualmente dispoñible resulta en moitos casos imposible o cumprimento destas ratios.
Neste momento forman parte do GES de Cervo, sumadas as diferentes quendas, 12 profesionais: un cabo e once efectivos integrados no cadro de persoal como traballadores municipais. Con este número de empregados, as baixas laborais, as vacacións e os demais permisos resulta imposible garantir dous efectivos os 365 días as 24 horas do día, tal e como establece o convenio. A alcaldesa insiste en que só a implicación destes profesionais e o sobre-esforzo económico que realiza o concello fai posible manter este servizo durante os últimos anos. Ademais a situación provocada basicamente pola escaseza de persoal deu lugar a reclamacións laborais e incluso xudiciais.
Demanda no Pleno municipal
García Caramés avanza tamén que, xunto ao escrito remitido, formalizará esta demanda á Deputación no Pleno municipal previsto para o vindeiro mércores, co obxecto de que todos os grupos da Corporación poidan chegar a un acordo que leve á administración provincial a implicarse, estudar e executar unha solución aos problemas descritos con anterioridade. Lembra que está obrigada porque son as deputacións as que, para concellos menores de 20.000 habitantes -Cervo non supera os 4.200- teñen a competencia sobre os servizos de protección civil e xestión de emerxencias.
Máis da metade das intervencións fóra de Cervo, superan todos os rexistros
A realidade é que o GES de Cervo ten unha intensa actividade: 601 intervencións en 2021, 669 en 2022 e 766 en 2023 e, ata o 28 de novembro xa se contabilizan 891, isto é 125 actuacións máis que no anterior período. Entre elas, asistencias a accidentes de tráfico, conatos de incendios e outras emerxencias.
Dáse a circunstancia que a maior parte das intervencións son fóra do termo municipal. De feito, aínda que o seu ámbito de actuación se cingue á Mariña occidental, este último ano actuou en situacións de emerxencias acontecidas en puntos distantes da súa base como consecuencia do peche dos parques de bombeiros da comarca.
A alcaldesa conclúe insistindo na idea de que Cervo quere seguir mantendo este importantísimo servizo, pero sempre en termos de eficiencia, seguridade e saúde laboral tanto para os traballadores como para as persoas ás que asisten.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas deste martes, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
