De torreznos e chiquitos por Ribadeo é a nova xornada gastronómica de Acisa para despedir o mes de novembro

Ribadeo, 21 de novembro de 2024. De torreznos e chiquitos por Ribadeo é a nova xornada gastronómica de Acisa para despedir o mes de novembro. Está organizada pola asociación en colaboración con Asoporcel, Celtagal e Azpilicueta. Nesta actividade participan 19 establecementos asociados a Acisa.

A presidenta de Acisa, Carmen Cruzado, contou que “do 29 de novembro ao 1 de decembro terá lugar De torreznos e chiquitos por Ribadeo, unha cita gastronómica na que participarán 19 locais hostaleiros asociados a Acisa, que van ofrecer algo moi tradicional e apetecible, un combinado de tapa de torreznos de porco celta e un chiquito de viño. Grazas á colaboración de Asoporcel e Celtagal puidemos desde Acisa organizar esta nova xornada. Celtagal facilítanos de forma gratuíta preto de 35 quilos de touciño de porco celta, que imos distribuír entre os locais participantes”.

Segundo lembrou o xerente de Acisa, Jesús Pérez, “esta é unha actividade que hai bastantes anos xa fora un éxito, solo cos chiquitos, e agora quixemos recuperar ese formato e amplialo. Esta é xa a cuarta vez que desde Acisa regalamos materia prima para a celebración dunha actividade gastronómica entre os establecementos participantes, co que pretendemos deste xeito aforrarlles custes nas campañas que lles propoñemos. Aos 35 quilos de touciño, hai que engadir que de xeito gratuíto tamén se lles fai entrega a cada participante de 24 vasos de chiquitos de cristal e dunha botella magnum de Azpilicueta. Os establecementos participantes deben pasar a buscar o material por as oficinas de Acisa”.

Cruzado Iglesias declarou: “queremos agradecerlle a Asoporcel a súa colaboración para poder organizar esta cita; a Celtagal, que nos cede o produto de porco celta de xeito totalmente gratuíto; e a Azpilicueta, que nos dona tamén as botellas magnum das que gozarán os locais hostaleiros. Evidentemente o touciño que lles facilitamos é unha pequena cantidade do produto que ofrecerán, co obxectivo de animalos a participar e para aforrarlles algúns custes, tal e como aconteceu coas xornadas da lura, da pescada ou da xarda”.

A presidenta de Acisa manifestou que “nesta ocasión apostamos por un produto de proximidade, dunha empresa da comarca da Mariña, e por un produto de calidade como é o porco celta. Agardamos que a cita sexa un éxito para todos”.

Pérez Prada indicou: “como novidade, xa que habitualmente dende Acisa damos liberdade para cobrar o que considere cada negocio, nesta ocasión esta oferta de chiquito mais tapa de torreznos terá un prezo de 2,50 euros por persoa. O chiquito poderá ser tanto de viño tinto como de viño branco e cada negocio poderá escoller que viño ofrece”.

E engadiu: “isto marca unha clara liña de acción da nosa asociación para este tipo de eventos, que é procurar realizar actividades facilitando materia prima para os participantes, o que sen dúbida consideramos que é un valor engadido que Acisa ofrece aos seus establecementos e tamén pode ser un valor engadido para atraer a novos establecementos a formar parte do noso colectivo”.

Carmen Cruzado dixo que “son 19 establecementos, tanto de Ribadeo vila, do porto, como de Rinlo os que participan, co que deste xeito espallamos esta cita gastronómica polas parroquias nas que tamén temos asociados e asociadas de hostalería. Son: O Indiano, Café Bar Copacabana, Barallocas, Galipizza, La Solana, La Flor de Jose, El Rincón del Gordo, Mareta, A Menchina, O Lar de Manolo, Bar Queimada, La Bugalla, Ramonita, A Mirandilla, Costa Verde, Taberna Arrancadeira, Bar Galicia, Araucaria e Cayo Coco”.

A presidenta de Acisa declarou que “con estas xornadas o que queremos é botar unha man e axudar á dinamización do sector hostaleiro nesta datas que soen ser de menor actividade e ofrecendo así un fin de semana especial, que ademais coincide coa campaña comercial do BlackFriday. Deste xeito propoñemos unha alternativa aos ribadenses e á veciñanza doutras localidades da Mariña e do Occidente asturiano para vir a Ribadeo a desfrutar dunha proposta gastronómica diferente, que a todo o mundo lle gusta, e dunha fin de semana de compras. Agardamos desde Acisa que sexa unha fin de semana de moito movemento en Ribadeo”.