A subdelegada do Goberno preside a Xunta de Seguridade do VII Rallye Mariña Lucense, que se celebra esta fin de semana, co fin de garantir a seguridade da proba

Lugo, 5 de maio de 2025. A subdelegada do Goberno en Lugo, Isabel Rodríguez, presidiu a Xunta Local de Seguridade con motivo da celebración da sétima edición do Rallye Mariña Lucense, que terá lugar os días 9, 10 e 11 de maio. Na reunión que tivo lugar na Subdelegación do Goberno participaron representantes das Forzas e Corpos de Seguridade do Estado, así como dos concellos polos que transcorrerá a proba: Viveiro, O Vicedo, Ourol, Cervo e Xove.

Durante o encontro, abordouse o dispositivo especial de seguridade que se activará para garantir o bo desenvolvemento da competición, con especial atención á coordinación entre os distintos corpos implicados e á protección do público asistente. Isabel Rodríguez destacou a importancia de “traballar de forma conxunta para que o rallye se celebre con todas as garantías, combinando o espectáculo deportivo coa máxima seguridade”.

A subdelegada agradeceu o labor da Escudería MixRallySports e a colaboración dos concellos implicados, ao tempo que apelou á responsabilidade de participantes e afeccionados para respectar as normas e as zonas habilitadas. O Rallye Mariña Lucense é a cuarta proba puntuable do Campionato Galego de Rallyes de Asfalto 2025 e contará cun percorrido de máis de 280 quilómetros, dos cales 88 serán cronometrados.