Alfoz inviste máis de 45.000 € na mellora da Escola Infantil e edificios municipais

Alfoz, 29 de novembro, 2025. O Concello de Alfoz vén de realizar diversas actuacións de mellora na Escola Infantil Galiña Azul situada na parroquia de Carballido e noutras dependencias municipais, co obxectivo de garantir o confort, a seguridade e a eficiencia enerxética dos edificios públicos.

Entre as principais actuacións figura o cambio da caldeira da Escola Infantil, executado con cargo ao Fondo de Compensación Ambiental (FCA) 2025, dentro do proxecto “Mellora da eficiencia enerxética de edificios municipais (Casa do Concello – Escola Infantil)”, financiado pola Consellería de Presidencia, Xustiza e Deportes da Xunta de Galicia cun importe total de 45.058,12 €.

Este investimento tamén incluíu a unión do sistema de calefacción da Casa Sociocultural coa Casa do Concello, co fin de optimizar o consumo enerxético e mellorar a xestión térmica dos dous edificios.

Ademais, con fondos propios municipais, o Concello levou a cabo máis melloras complementarias na Escola Infantil, como a substitución da secadora e do microondas, o cambio das columnas do peche do patio, o arranxo dunha cociña da zona de xogos, pés elaborados para poñer en altura as bandexas de experimentación para levar a cabo unha metodoloxía de manipulación e experimentación e a instalación de topes nas portas, reforzando así a seguridade e o mantemento das instalacións.

A alcaldesa de Alfoz, Efigenia Maseda Paz, subliñou que “estas actuacións reflicten o compromiso do Concello coa eficiencia enerxética e coa educación infantil, mellorando o confort dos máis pequenos e do persoal e garantindo un servizo público de calidade”.

O Concello de Alfoz continúa deste xeito coa súa aposta pola mellora continua das infraestruturas municipais, combinando o aforro enerxético co benestar da veciñanza.