Xove presenta o programa do 8M cunha homenaxe ás primeiras mulleres emprendedoras do municipio

Xove, 25 de febreiro, 2026. O Concello de Xove, a través da Concellería de Servizos Sociais, Sanidade, Muller e Políticas de Igualdade, presentou esta semana a programación do 8M. Os actos comezarán o domingo 8 de marzo coa tradicional Andaina pola Muller, de carácter reivindicativo. A continuación celebrarase a habitual chocolatada, na que, ademais de compartir merenda, se renderá homenaxe ás primeiras mulleres emprendedoras do comercio local. As protagonistas asistirán ao acto e proxectarase un vídeo no que relatan a súa experiencia como empresarias nun tempo no que o mundo dos negocios seguía sendo maioritariamente masculino.

Este ano 2026, a área de Servizos Sociais, Sanidade, Muller e Políticas de Igualdade pon o foco na importancia da corresponsabilidade entre homes e mulleres nos procesos educativos e de coidado familiar. O Concello subliña que a dobre carga laboral e doméstica que asumen moitas mulleres continúa a ser unha das desigualdades máis invisibles e con maior impacto social. A falta de corresponsabilidade —explican— deriva en renuncias profesionais, maior presenza feminina na contratación a tempo parcial, descenso da natalidade e un incremento da presión sobre os servizos públicos de coidados.

Co obxectivo de promover unha maior conciencia social sobre esta cuestión, o Concello de Xove organizará durante os meses de marzo e abril tres faladoiros dirixidos a familias e profesorado. As sesións buscarán fomentar modelos relacionais máis igualitarios, tanto no ámbito familiar como no educativo. Estes faladoiros están cofinanciados pola Consellería de Política Social e Igualdade da Xunta de Galicia e polo Ministerio de Igualdade.