O Sindicato Labrego Galego pide a apertura do mercado dos mércores e sábados en Ribadeo

Ribadeo, 23 de marzo, 2020. O Sindicato Labrego Galego, tras contactar coas labregas que adoitan participar no mercado dos mércores de Ribadeo e comprobar a súa disposición a recuperar esta necesaria e tradicional cita semanal, ven de presentar no rexistro do Concello de Ribadeo unha solicitude para a reapertura á maior brevidade da venda de alimentos locais dos mercados dos mércores e sábados nos exteriores da praza de abastos da vila.
Achégase o contido da solicitude presentada:
Os mercados municipais, calquera que sexa a súa periodicidade, supoñen a principal vía de ingresos económicos para miles de familias labregas na Galiza que apostaron pola venda directa dos seus produtos e por unha relación de ti a ti coa súa clientela.
As restricións e prohibicións decretadas polo estado de alarma e a emerxencia sanitaria foron interpretadas de maneira errónea por moitos concellos como unha obriga de pechar estes mercados, privando aos labregos e labregas que venden neles dunha das súas principais fontes de ingresos. O impacto nas economías labregas é aínda maior se pensamos que algúns dos principais compradores de alimentos labregos, como comedores escolares, tamén deixaron de funcionar por mor do estado de alarma e da emerxencia sanitaria.
O estado de alarma e a emerxencia sanitaria permiten a celebración de mercados de alimentos, xa que están a fornecer á poboación dun ben esencial que non debe sufrir ningún tipo de coerción ou atranco. De seguido, seleccionamos algunhas das instrucións de instancias como a Comisión Europea, o Goberno do Estado ou a Consellaría de Medio Rural ao respecto:
• A compravenda de alimentos está protexida dentro da actual situación de emerxencia sanitaria, permitíndose os desprazamentos a centros comerciais para a súa adquisición, mesmo con total liberdade horaria, tal e como reflexa o artigo 7 do Real Decreto 463/2020. Se ben é certo que se recomenda non celebrar actividades ao aire libre, entre as que se incluíron as feiras e os mercados, a recomendación especifica que vai dirixida a “aqueles eventos que supoñan concentracións de máis de 1.000 persoas”, polo que os mercados de proximidade que se celebran periodicamente en Galiza non entrarían neste suposto, non sendo incluídos tampouco estes espazos na relación de equipamentos e actividades con apertura ao público que quedan suspendidos segundo o disposto no artigo 10 do Real Decreto 463/2020, do 14 de marzo.
• A circular publicada pola Comisión Europea baixo o título “COVID 19. Directrices para medidas de xestión fronteiriza para protexer a saúde e garantir a dispoñibilidade de bens e servizos esenciais”, con data do 16 de marzo, a circulación de alimentos debería quedar protexida e blindada na actual crise. Así, no sexto punto do segundo capítulo desta circular di
que “Os Estados membros deberán preservar a libre circulación de todas as mercadorías. En particular, deberán garantir a cadea de subministración de produtos esenciais como medicamentos, equipos médicos, produtos alimentarios esenciais e perecedoiros e gando. Non se deberá impoñer ningunha restrición á circulación de mercadorías no mercado único,
especialmente (sen limitarse a) bens esenciais, relacionados coa saúde e perecedoiros, nomeadamente produtos alimentarios, salvo que estean debidamente xustificados”.
• O Goberno de España, a través da súa delegación na Comunitat Valenciana, respondeu ao Govern da Generalitat que “…sobre a posibilidade de autorizar a venda ambulante de mercadorías en mercados autorizados (…) Autorízanse unicamente a venda de produtos de primeira necesidade. Enténdese por produtos de primeira necesidade a alimentación e
a droguería (hixiene e limpeza)”.
• Comunidades autónomas como Illes Balears, na normativa que rexe o estado de alarma na súa comunidade inclúese o seguinte punto: “Pídese aos concellos que manteñan os postos agroalimentarios nos mercados municipais, semanais e estacionais, como medida para garantir o subministro alimentario á cidadanía”. Castela A Mancha tamén publicou unha instrución da súa Consellería de Sanidade no mesmo sentido o 18 de marzo.
• A Consellaría de Medio Rural, nunha nota de prensa emitida o 19 de marzo, dirixíndose ao Ministerio de Agricultura, di: “Así, o conselleiro puxo sobre a mesa, por exemplo, a posibilidade da venda ambulante para as persoas que se dedican á distribución de produtos alimentarios de proximidade e para os vexetais a por maior e menor para a plantación en hortas, xa que o peche dos mercados lles está dificultando -dixo- chegar aos seus clientes. Neste aspecto, tamén trasladou que a Administración autonómica entende posible permitir a celebración de mercados municipais só con este tipo de produtos básicos e sempre respectando as distancias de seguridade entre os postos e evitando aglomeracións”.
Por todo iso desde o Sindicato Labrego Galego solicitamos ó Concello:
1. Que se reanude a celebración do mercado semanal, EXCLUSIVAMENTE PARA PRODUTOS ALIMENTARIOS, proporcionando aos vendedores e vendedoras todas as instrucións e materiais necesarios para poder desenvolver o seu traballo como distribuidores de bens esenciais nunhas condicións idóneas de seguridade e hixiene, de acordo coas recomendacións das autoridades sanitarias, para evitar contaxios.
2. Que apoie as granxas ribadenses e da contorna, para paliar a difícil situación que están a atravesar, mercando os seus produtos para fornecer as compras de alimentos programadas polos servizos sociais municipais ou calquera outras que dependan da súa competencia.
3. Que promova o consumo nos mercados de proximidade como medida de apoio ás economías locais e por ser máis seguros, dende o punto de vista sanitario, que o comercio en recintos pechados nos que se poden producir aglomeracións humanas e nos que non existe control sobre as persoas que manteñen contacto cos produtos dos andeis.