O delegado territorial, Javier Arias, participou nun foro promovido polo club empresarial Nordés para analizar os desafíos e oportunidades neste ámbito
Lugo, 30 de outubro de 2025. O delegado territorial da Xunta, Javier Arias, participou hoxe en Lugo na apertura da xornada sobre economía verde promovida polo club empresarial Nordés, co foco posto nos desafíos e oportunidades do sector agroalimentario.
Arias defendeu que a provincia lucense “destaca pola súa capacidade para xerar proxectos ligados á economía verde, á biotecnoloxía e á transformación” neste ámbito, “demostrando que é posible crecer mantendo o equilibrio entre desenvolvemento económico e respecto polo territorio”.
O delegado resaltou a aposta do Goberno galego por impulsar a modernización e o liderado tecnolóxico nun sector que achega arredor do 6,4 % do PIB galego, emprega a máis de 100.000 persoas – especialmente no medio rural – e que acadou en 2024 un volume de exportacións superior aos 4.000 millóns de euros.
Tamén apuntou algunha das liñas estratéxicas coas que a Xunta está a impulsar a innovación no eido agroalimentario galego, como a Business Factory Food (BFFood), a primeira aceleradora de Galicia especializada na industria da alimentación, que ten prestado apoio a varios proxectos innovadores de firmas lucenses.
Implementar de forma efectiva as políticas públicas
Arias destacou a importancia deste tipo de encontros -como é tamén a iniciativa Conecta Lugo, promovida conxuntamente pola Xunta e a Confederación de Empresarios de Lugo (CEL)- “que favorecen o intercambio de ideas e experiencias que contribúen a implementar de forma máis efectiva as políticas públicas”.
Tamén expresou a súa preocupación “porque a iniciativa privada desista de investir na provincia se cunde a idea de que se bloquean os proxectos”. Así, referiuse á recente renuncia do Grupo Lence a construír unha planta no Ceao ou á decisión do Goberno central de deixar a Lugo fóra dos plans de mellora da rede eléctrica, “o que afecta non só a un proxecto, senón que frea calquera iniciativa industrial no noso territorio”.
Nese mesmo contexto, referiuse “ao bloqueo xudicial sistemático aos proxectos eólicos en Galicia”, con sentenzas “que seguen a paralizar o desenvolvemento das enerxías limpas e verdes na comunidade, algo que dana tanto o medio ambiente como á economía galega”, a pesares de que o Tribunal de Xustiza da Unión Europea (TXUE) avala a tramitación ambiental dos parques feita na comunidade.
Ata o 4 de agosto poderán realizarse as renovacións, mantendo as tarifas aprobadas en asemblea: 200 € e 250 € para adultos, e acceso gratuíto para menores grazas ao convenio coa Fundación Imdecum, con opción voluntaria de abono infantil por 40 € con reserva de asento. A partir do 5 de agosto activaranse as novas altas. Os abonos poderán tramitarse a través de CLUBER ou presencialmente na oficina do club, con horario de mañá e tarde en xullo e só de mañá en agosto.
A Presidenta Carmela López destacou o valor deste produto emblemático da Mariña e o traballo do sector pesqueiro. Rocío Rivera e Herminia Pernas puxeron en valor a tradición mariñeira de Burela e o papel dos mariñeiros da Moncloa. O público degustou 450 tapas elaboradas con bonito nunha xornada que serviu de escaparate desta cita gastronómica e de convite a visitar Burela a próxima fin de semana.
As crianzas desfrutaron dunha refrescante xornada con inchables e xogos acuáticos na contorna do complexo deportivo da Veiga.
Trátase dunha mostra de 28 fotografías de gran formato do naturalista Ezequiel Martínez que reivindica a diversidade e a conservación da fauna salvaxe. A iniciativa, organizada polo Concello da Pastoriza en colaboración con ABANCA e Afundación dentro do proxecto Corrente cultural, poderá visitarse de balde ata o 26 de agosto. As imaxes, acompañadas de textos divulgativos elaborados por especialistas de Naturnova, amosan especies emblemáticas como o oso pardo, a cegoña, o cervo ou a aguia imperial, convidando a reflexionar sobre a importancia de protexer o patrimonio natural.
O campo de fútbol do Cascabeiro acolleu o pasado sábado a III Festa do Mexillón, organizada polo Celta Barreiros. Centos de persoas achegáronse a gozar dunha tarde de gastronomía e de música. En total foron servidas 670 racións entre veciñanza e visitantes, que saborearon mexillóns e lacón. Os organizadores amosasen satisfeitos da acollida: “estamos contentos pola boa resposta dos asistentes”. E tiveron palabras de agradecemento “para os Concellos de Barreiros e de Foz pola boa colaboración”.
