O BNG reclama máis persoal de apoio no CEIP de Covas ante a “situación insostible” do centro

Daniel Castro presentou unha iniciativa para aumentar as prazas de Audición e Linguaxe e Pedagoxía Terapéutica, consideradas insuficientes polas familias e a comunidade educativa

Santiago de Compostela, 22 de xaneiro de 2026. O deputado do Bloque Nacionalista Galego, Daniel Castro, vén de presentar no Parlamento de Galicia unha iniciativa para esixir á Consellería de Educación un incremento “urxente” do persoal especializado de Audición e Linguaxe (AL) e Pedagoxía Terapéutica (PT) no CEIP Plurilingüe de Covas, en Viveiro.

Castro advertiu de que o centro, con 154 alumnos e alumnas, conta cunha dotación “totalmente insuficiente” de profesionais, unha situación que —segundo denunciou— se arrastra desde cursos anteriores e continúa empeorando. O deputado criticou ademais que a Xunta nomease á pedagoga terapéutica como directora, cunha dedicación de só sete horas semanais, sen cubrir a súa ausencia con outro especialista.

As familias levan oito venres consecutivos concentrándose ás portas do colexio baixo o lema “Venres Negros”, reclamando máis recursos para o alumnado con necesidades específicas.

A proposta do BNG solicita incorporar unha profesional de AL a tempo completo e unha profesional de PT a media xornada, destinada a cubrir as horas de dirección que actualmente asume a pedagoga terapéutica. “Non é unha petición utópica, é o mínimo necesario para garantir unha educación digna”, afirmou Castro.

O deputado criticou tamén o silencio da Administración ante as demandas da ANPA, que leva máis de cen días sen resposta, e cuestionou o catálogo xeral de dotacións da Xunta, ao considerar que “non se axusta á realidade dun centro con altos índices de necesidades específicas, risco de exclusión e absentismo crónico”.

Castro concluíu que o que ocorre en Covas é “o resultado de anos de abandono político” e asegurou que continuará a presión parlamentaria para revertir esta situación.