O BNG impulsa un acordo na Deputación para esixir a exclusión da frota artesanal da aplicación do Regulamento de Control da Pesca

Daniel García: “ Agora o goberno español debe demostrar se existe unha vontade real de defender a frota de baixura”

Lugo, 27 de xaneiro de 2026. O BNG logrou a unanimidade da corporación provincial para esixir ao goberno do Estado que negocie coa Comisión Europea a exclusión da frota artesanal do ámbito de aplicación do Regulamento de Control da Pesca, que entrou en vigor o pasado 10 de xaneiro.

A formación nacionalista considera insuficientes as medidas de flexibilización anunciadas polo Ministerio de Pesca a pasada semana e mantén o seu apoio ás demandas da frota de baixura mariñá e galega, que reclama que se teñan en conta as especificidades da pesca artesanal.

Así o defendeu no pleno o deputado Daniel García que sostivo que “o conflito de fondo segue sen resolverse. Esta flexibilización non pode ser un punto final, se non un punto de partida. Agora o goberno español debe demostrar se existe unha vontade real de defender unha regulación máis xustas, proporcionadas e intelixentes en Europa”.

“O futuro decídese en Bruxelas e alí deben escoitarse as voces dos que pescan cada dia a poucas millas da costa, sostendo unha actividade esencial que merece unha regulación adaptada á súa realidade”, insistiu o deputado barreirense.

“A pesca en Galiza é un dos modelos máis sostibles: ten un baixo impacto ambiental, usa aparellos de pesca selectivos e baséase nun coñecemento tradicional do medio ambiente. Impoñerlle unha burocracia excesiva non mellora o sistema, senón que acelera a súa desaparición”, advertiu durante a súa intervención no pleno, dando continuidade á actividade institucional e política en defensa da baixura que o BNG mantivo desde a aprobación do regulamento europeo.

A moción promovida polo BNG insta ao Goberno do Estado a negociar coa Comisión Europea a exclusión da frota artesanal do ámbito de aplicación do Regulamento de Control de Pesca e a aprobar, entre tanto, unha moratoria de aplicación da norma.

Tamén urxe á Xunta de Galiza a exercer e defender as súas competencias exclusivas en materia de augas interiores, desenvolvendo normas propias de control adaptadas á realidade da frota artesanal galega.