O IES de Ribadeo Dionisio Gamallo súmase ás actividades polo centenario de Leopoldo Calvo-Sotelo

Ribadeo, 21 de abril, 2026. O IES de Ribadeo Dionisio Gamallo súmase á celebración do centenario do nacemento de Leopoldo Calvo-Sotelo cun espazo dedicado á súa figura no ESPAZO EUROPA da Biblioteca. A iniciativa, promovida polo Concello, destaca o papel do político ribadense na transición democrática, o seu impulso ás relacións con Europa e a súa participación na sinatura do Estatuto de Galicia o 18 de maio de 1981.

Unha das actividades previstas é a proposta da Delegación de Cultura e do semanario La Comarca del Eo para elaborar unha edición especial da Comarca dos Pícaros. O alumnado dos centros educativos de Ribadeo poderá enviar achegas relacionadas coa figura de Calvo-Sotelo, que se publicarán en diferentes números en función da cantidade de traballos recibidos.

Como Escola Mentora das Escolas Embaixadoras do Parlamento Europeo, o IES Dionisio Gamallo conta na súa biblioteca cunha sección dedicada á historia e á política contemporánea. Neste espazo inclúense publicacións sobre a transición española e sobre os cambios sociais e institucionais que marcaron as últimas décadas.

A figura de Leopoldo Calvo-Sotelo está presente a través das súas propias reflexións sobre o período histórico que lle tocou vivir, así como mediante obras doutros autores que analizan o seu papel público. O seu labor abrangue desde a etapa como ministro para as Relacións coas Comunidades Europeas —na que iniciou as negociacións para a adhesión de España ao Mercado Común— ata o seu mandato como presidente do Goberno entre 1981 e 1982, período no que se impulsaron avances que permitiron a posterior sinatura do Tratado de adhesión á CEE en 1985.

O centro destaca que a historia se constrúe coas persoas e tamén se aprende nas aulas, revisando o camiño percorrido por quen contribuíu a transformar a sociedade. Achegar ao alumnado figuras relevantes da contorna local que tiveron un papel destacado na vida pública é unha oportunidade educativa de grande valor.

O IES de Ribadeo subliña que, como Escola Embaixadora do Parlamento Europeo, mantén o compromiso de promover valores como a convivencia, a participación cidadá e o coñecemento das institucións europeas, fundamentais para comprender o presente e construír o futuro.