A Xunta e o Concello de Cervo reúnense cos propietarios de Sargadelos na nova etapa que inicia a factoría

Cervo, 8 de abril de 2013-O alcalde de Cervo, Alfonso Villares, o conselleiro de Economía e Industria, Francisco Conde e a delegada da Xunta en Lugo, Raquel Arias reuníronse o pasado mércores con Xosé Díaz e José Luis Vázquez, propietarios da Fábrica de Cerámica de Sargadelos. Unha xuntanza que fora solicitada polos donos da factoría e que foi formulada como unha presentación da sexta etapa de Sargadelos despois das novas incorporacións producidas na propiedade da fábrica hai unhas semanas.

No encontro, que tivo lugar nos Edificios Administrativos da Xunta en Santiago de Compostela, Díaz e Vázquez trasladaron aos representantes públicos o seu proxecto para reconducir e darlle un novo pulo a esta fábrica histórica. Tal e como explica o rexedor “os administradores de Sargadelos coinciden en avogar por darlle un futuro ao complexo empresarial e a todo o que leva consigo Sargadelos como iniciativa empresarial, artística, cultural e histórica”.

Villares valorou moi positivamente esta primeira toma de contacto e o obxectivo esencial, fixado polas dúas familias con capital maioritario no grupo empresarial, de marcar un antes e un despois coa xa bautizada como sexta etapa de Sargadelos. “Dende o Concello de Cervo desexamos que esta nova fase resulte moi frutífera e beneficiosa para o grupo e, deste xeito, para o municipio cervense en particular e para toda a sociedade galega en xeral como comunidade que atopa en Sargadelos unha simboloxía e unha identidade con séculos de historia e, agardamos, con moito futuro por diante”. O rexedor aproveitou para manifestar a súa disposición por “manter aberta a liña de colaboración do Concello coa factoría”.