O presidente dos afectados polos abusos eléctricos felicita ao Concello de Cervo pola súa sección de axuda ao consumidor

O presidente da Plataforma de Afectados polos Abusos do Mercado Eléctrico, Jose Luís Moñita, felicita ao Concello de Cervo polo servizo que está a dar aos veciños a través da súa sección de axuda ao consumidor sobre asuntos eléctricos na que xa conseguiu dende outubro solucionar os problemas de cinco usuarios. Ademais, Moñita estende a felicitación ao Concello polo contacto permanente que ten coa Consellería de Industria “que lles permite axilizar os trámites xa que polo que dá a entender, iso consigue que se resolvan antes os problemas do Concello de Cervo que os dos outros municipios”.

O portavoz da plataforma explica que se alegran de que o concello se preocupe dos problemas dos veciños relacionados cos temas eléctricos, que se faga con fondos públicos e que teñan persoal con coñecementos nesta materia. “Estamos seguros de que o Señor Villares, como máxima autoridade do Concello de Cervo é capaz de tranquilizar a todos os veciños asegurándonos que a substitución de contadores que se está levando a cabo nestes días no municipio non vulnera ningún dereito dous usuarios así coma que todos os contadores dixitais que está a instalar Begasa teñen a autorización de uso por parte da Xunta de Galicia. Moitos deles responsabilidade do Concello, coma titular dos mesmos. Isto sería realmente tranquilizador e estariamos moi agradecidos ao señor Villares”, manifesta José Luís Moñita. Asimesmo, o presidente do colectivo lembra que o alcalde cervense comunicou nunha xuntanza que tivo lugar en outubro que dende o Concello e a Fegamp estaban estudando emprender accións legais contra Begasa e as comercializadoras, “cousa que supoñemos está a piques de suceder”.

Por outro lado, José Luís Moñita refírese tamén ás declaracións feitas pola edil de Facenda, Yolanda Pedreira, nas que recomenda desconfiar dalgún membro dalgunha entidade que, baixo máscara da defensa dos consumidores agocha os seus intereses privados, económicos e laborais. A plataforma solicita que se dean nome das devanditas entidades e dos seus membros, así como a forma pola que se están a enriquecer con esa actividade para poder denuncialo, “incluso non descartamos accións legais contra ditas entidades e membros”.

Finalmente, a plataforma de afectados polos abusos eléctricos lamenta que non puideran acudir nin Alfonso Villares nin Yolanda Pedreira á charla que tivo lugar este luns no salón de actos do CIT de San Cibrao. Pero si se alegran de que o concelleiro Luís Guillén estivera de xeito conxunto cos 150 asistentes “que semellan ser algúns mais dos que reclamaron ata agora no concello”. A próxima cita da plataforma será o xoves día 18 de abril en Ribadeo e aproveitan para convidar novamente ao alcalde cervense e a edil de Facenda, “aínda que si non conseguiron facer un oco na súa axenda para asistir ás de Cervo comprendemos que será mais complicado velos alí”, conclúe José Luís Moñita.