Os Aventados presenta este venres a súa festa anual na que entregará os premios Árdelle o Eixo, Árdelle o carro, a toda unha vida e A de Calidade

A Asociacion Cultural Mariñá “OS AVENTADOS” presenta este venres a festa dos Aventados que se celebrará o domingo 22 de marzo en San Cibrao e na que se entregarán os premios: ÁRDELLE O EIXO, ÁRDELLE O CARRO, A TODA UNHA VIDA E Á CALIDADE DOS ESTABLECEMENTOS DE HOSTALERÍA do 2014.

O premio ÁRDELLE O EIXO para aquela persoa, animal ou cousa do norte galego que se distinguiran polo seu labor social, político, artístico, deportivo, industruial, medioambiental e de conservación do patrimonio; mentres que o premio ARDELLE O CARRO se dedica a aquela persoa, animal ou cousa do norte galego que se distingue ó cabo do ano pola súa nefasta xestión no ámbito social, político, artístico, deportivo, industrial, medioambiental e de conservación do patrimonio.

Os premios serán en ámbolos casos unhas esculturas de cerámica do compañeiro en argalladas Otero Regal, pero non levarán consigo ningunha gratificación económica nin lucrativa.

E posteriormente, entregaranse os premios A TODA UNHA VIDA que se crearon fai 4 anos para dedicar a unha persoa pola súa traxectoria profesional, social, vital e persoal; ademais dun dos distintivos con “A” (de Aventados) DE CALIDADE, a tres, hoteleiros, hosteleiros e restauradores da Mariña de Lugo.

En anos pasados foron premiados, Díaz Pardo, Ramón Pernas, Jesús López (exalcalde de Xove), Carlos Novo Cal, Jesús Fernández, Restaurante Boavista, Restaurante O Asador, Restaurante de Cordido, entre outros.

E no aspecto negativo os premiados foron: a masiva plantación de eucaliptos, os transfugas políticos, a destrucción do patrimonio histórico e monumental, o alcalde de Barreiros, por permitir a destrucción urbanística no seu concello, a Urdangarín, como símbolo da corrupción, entre outros.

Os premios son de carácter anual e, para outorgalos, tódolos socios de OS AVENTADOS poden propoñer ás persoas que cren merecentes dos mesmos. Con esas propostas, un xurado nomeado pola xunta directiva escolle os galardoados.