O Centro de Estudos Galegos da Universidade Complutense coñece o Modelo Burela

Burela, 22 de marzo de 2016.- De como se traballa no Centro de Estudos Galegos da Universidade Complutense xa falou no seu momento a profesora Lidia López Teixeiro no programa de Radio Burela Proxecto Neo, buque insignia do Modelo Burela nas ondas. Mais nestes días os compoñentes do equipo puideron comprobalo directamente, cos seus propios ollos.

A profesora Lidia ideou unhas xornadas de estudo itinerante e que comentou a proposta co alumnado, este apoiou a idea e en conxunto lla propuxeron á profesora Carmen Mejía Ruiz, a cal -ao estilo Xurxo Souto- dixo aquilo de “Avante Toda”.

Mais non só dixo “Avante Toda”, senón que tamén puxo a funda de traballo e integrouse na expedición e así chegaron a Mondoñedo, e de Mondoñedo a Viveiro, e de Viveiro a Rinlo, e Rinlo a Burela e a Cervo e Xove…

E, como pararon en Burela, coñeceron Helena e Maka, e Lavilson e Diego. E estiveron no recuncho do Doce Lecer e conversaron con Dori, xusto diante de Rosalía e de Maruxa. E a fotógrafa oficial de Proxecto Neo, Lucía Rivas, encargouse da reportaxe gráfica.