Turismo de Galicia colaborará co xeodestino da Mariña Lucense na realización de actividades de promoción e información do turismo

O Consello da Xunta aprobaba este xoves 14 de abril a subscrición dos convenios plurianuais de colaboración entre Turismo de Galicia e a Mancomunidade do Salnés, a Mancomunidade dos municipios da Mariña Lucense, o Consorcio de Turismo da Ribeira Sacra e a Mancomunidade de municipios de Ría de Arousa Zona Norte para a realización de actividades de promoción e información do turismo nestes xeodestinos.

O obxectivo destas colaboracións é contribuír, a través de actividades relacionadas coa promoción, dinamización e fomento da riqueza e do turismo destes xeodestinos, á potenciación destes territorios como destinos turísticos.

Estes convenios constitúen unha continuación da colaboración establecida estre estas comarcas e Turismo de Galicia, a través dos plans de dinamización desenvolvidos nestas áreas, levando agora a cabo actuacións que afectan o conxunto dos territorios, para desta, forma reafirmar estes xeodestinos xa moi definidos no ámbito turístico.

Ao mesmo tempo, procúrase a través destes convenios a sensibilización tanto dos visitantes como dos propios veciños das zonas sobre a importancia de preservar e poñer en valor o patrimonio natural, artístico e cultural que, ademais de ter unha clara proxección turística, é un importante factor de dinamización económica destes xeodestinos.

Así, estes convenios, ademais de responder ás liñas estratéxicas trazadas no Plan integral de turismo de Galicia, contribuirán a divulgar a realidade e potencialidade da nosa comunidade, como receptora dun turismo de calidade, e incidirán no seu maior desenvolvemento e coñecemento no exterior.

Entre as iniciativas que levarán a cabo nestes xeodestinos no marco destes acordos encóntranse a elaboración de contidos, promoción en plataformas e famtrips dirixidos a mercados internacionais; a execución de plans de e-márketing; iniciativas para a consolidación e creación de produtos turísticos; actividades formativas para os axentes turísticos; accións de accesibilidade universal aplicada á promoción turística; iniciativas para o fomento do turismo deportivo e a natureza ou para o impulso do turismo gastronómico, entre outras.

Para a consecución destas actividades, Turismo de Galicia realizará unha achega económica de 760.000 euros dos cales, 200.000 € irán destinados á comarca do Salnés, 200.000 € á Ribeira Sacra, 200.000 € á ría de Arousa Zona Norte e 160.000 € á Mariña lucense.

Turismo de Galicia reafirma así a súa aposta pola promoción destes xeodestinos incrementando en máis dun 18 % o seu investimento total en relación á achega realizada no bienio 2014-2015.

A vixencia dos convenios de colaboración manterase ata o 15 de decembro de 2017.