Elena Candia: “os novos emprendedores son a esperanza do país, permiten o seu desenvolvemento económico e o seu benestar”

Vilalba, 15 de xuño de 2016.- A Presidenta do PP de Lugo, Elena Candia, acompañada do cabeza de lista ao Congreso, Joaquín García Díez, e da candidata ao Senado, Sandra Vázquez Domínguez, así como doutros representantes da comarca, visitaron este mércores nun acto de campaña a empresa eólica Tecnorenova, onde puxo de manifesto que “os mozos emprendedores son a esperanza do país, pois permiten o seu desenvolvemento económico e, en consecuencia, o seu benestar”.

Durante a visita, Elena Candia destacou o importante papel que o emprendemento empresarial está a desenvolver no noso país, creando novos postos de traballo e promovendo a reactivación da economía e avance en materia social. “O emprendemento é unha panca sobre a que está a despegar a economía de Lugo e de todo o país”.

Tecnorenova naceu no ano 2006 da man de Alberto Román Prieto, un mozo de 22 anos que decidiu abrir a súa propia empresa adicada ao sector eólico en Lugo. Hoxe, o ente empresarial conta con ademais da sucursal de Vilalba, outros dous centros en Latinoamérica e outros dous máis que están a piques de abrir, cun total de 150 empregados que acomenten obras por todo o mundo. Todo isto, grazas ao esforzo do capital humano da empresa que, con moitas horas de ilusión e traballo, conseguiron posicionala internacionalmente nun momento de complicación económica.

A líder dos populares en Lugo non quixo deixar de amosar a súa satisfacción polo bo porvir de Tecnorenova, a quen puxo como exemplo de emprendemento e boa xestión.

Candia lembrou que é necesario potenciar o emprendemento para que os mozos sexan quen de materializar as súas ideas. “Hai que traballar en materia de emprendemento porque pode devolvernos unha parte da estabilidade económica perdida como xa está a facer Tecnorenova”.

A Presidenta dos populares en Lugo amosou o firme compromiso do Partido Popular co emprendemento. Lembrou as medidas que a Xunta de Galicia puxo en marcha en favor da creación de novas empresas na comunidade como a Lei de Emprendemento, que reduce as trabas administrativas para iniciar un negocio e ofrece vantaxes fiscais a quen destine o seu capital ao financiamento destes proxectos; a Lei de Economía Social, que facilita o uso do cooperativismo como modelo de creación de emprego ou as subvencións autonómicas para os autónomos que contraten ata tres persoas asalariadas nos tres primeiros anos de actividade.

Tamén deixou clara a súa aposta pola formación, pois dixo que é necesario orixinar novas xeracións de empresarios que dispoñan da competencia profesional necesaria e da suficiente coraxe para seguir asegurando o avance do país.

Política enerxética e enerxía renovable
Durante a visita, o cabeza de lista ao Congreso pola provincia de Lugo, Joaquín García Díez, lembrou que as reformas acometidas polos populares permitiron fixar as bases dunha política enerxética que impulsa a eficiencia en custos e en recursos, que loita contra o cambio climático e que permite a España adaptarse aos novos retos tecnolóxicos que poidan orixinarse no futuro.

Ademais reiterou o firme compromiso dos populares co sector enerxético para a nova lexislatura, reducindo impostos sobre a xeración eléctrica o que redundará nun abaratamento da factura ou introducindo novas instalacións renovables mediante poxas competitivas, especialmente nas tecnoloxías con maior incidencia na creación de emprego e desenvolvemento industrial.