O Concello de Foz amplía o horario da exposición en homenaxe ao artesán Pepe de Burón que está na Casa da Cultura . Pode visitarse de 19 a 21 horas ata este venres

Foz, 18 de abril de 2018. A Delegación de Cultura e Educación do Concello de Foz ampliou o horario da exposición en homenaxe a Pepe de Burón, artesán de Mañente, que foi inaugurada o pasado venres na Casa da Cultura, concretamente no primeiro andar desta instalación municipal. Agora pode visitarse de 19:00 a 21:00 horas ata este venres, día 20, e hai horarios especiais para os centros escolares.
O concelleiro de Cultura e Educación en Foz, Ánxel Paleo, lembra que é unha mostra “en homenaxe a José Díaz Fernández, máis coñecido como Pepe de Burón, veciño do barrio de Mañente, na parroquia de Vilaronte. Era unha persoa autodidacta, un artista na talla de madeira, na de pedra, lousa, mármore e no repuxado de coiro. Deixounos para o recordo grandes obras mestras e incluso el mesmo facía a ferramenta que utilizaba. Convido a todos os veciños a que se acheguen para coñecer a vida e obra dun dos artistas do concello”.