Ribadeo non pagará o alumeado público da Ponte dos Santos pola desatención de Fomento coas súas infraestruturas

O CONCELLO NON VAI PAGAR O ALUMEADO PÚBLICO DA PONTE DOS SANTOS. FERNANDO SUÁREZ AMOSÓUSE ASÍ DE CONTUNDENTE DESPOIS DE COÑERCER A OPINIÓN DO MINISTERIO DE FOMENTO AO QUE ACUSA DE DESATENCIÓN COAS SÚAS INFRAESTRUCTURAS.

Ribadeo, 18 de xuño de 2012. O Concello de Ribadeo non vai pagar o alumeado público da Ponte dos Santos. Así de contundente se manifestou esta mañá o alcalde, Fernando Suárez, despois de coñecer que o Ministerio de Fomento considera que deben ser Castropol e Ribadeo os que financien dito alumeado.

O rexedor dixo que “isto é algo ao que xa nos referimos hai un tempo e a min paréceme un absurdo. O Concello de Ribadeo por nada e para nada vai sufragar un gasto que lle corresponde íntegramente ao Ministerio de Fomento, dado que a Ponte dos Santos correspóndelle ao goberno do Estado e non ao Concello de Ribadeo”.

Suárez Barcia referíuse ao exemplo que xa puxo noutras ocasións, “no propio treito da Autovía do Cantábrico ao seu paso por Ribadeo, a uns 300 metros despois da ponte no noso ámbito municipal, o alumeado público dese vial é sufragado polo Ministerio de Fomento, polo tanto considero un absurdo que pretendan que o Concello pague a metade dese alumeado público da ponte xunto coa outra metade que tería que afrontar Castropol”.

O alcalde de Ribadeo advertiu de que “ante posibles circunstancias perigosas que se poidan producir na Ponte dos Santos serán imputables ao propio Ministerio de Fomento por ter unha desatención das súas infraestructuras, pero para nada o Concello se vai facer responsable de algo que non é da súa propiedade, do mesmo xeito que tampouco se fai responsable do alumeado da zona portuaria de Ribadeo, aínda que estea encastrado no noso casco histórico. Neste exemplo é Portos de Galicia o que se fai cargo”. E insistiu en que “a cada un o que é o seu, ao césar o que é do césar e que o Ministerio de Fomento se preocupe de manter as súas infraestruturas sen botarlle a culpa da súa falla de atención aos demáis”.

Fogueiras de San Xoan e San Pedro

O Concello ven de publicar un bando sobre as fogueiras de San Xoan e de San Pedro “para que todas aquelas persoas que queiras facer estes lumes populares soliciten o permiso correspondente no Concello de Ribadeo”, indicou o alcalde. O prazo máximo será para as fogueiras de San Xoan ata as 14 horas do vindeiro 21 de xuño e para as fogueiras de San Pedro ata as 14 horas do 27 de xuño.

Suárez Barcia lembrou que “se prohíbe, como todos os anos, queimar rodas ou cubertas de goma, plástico ou calquera material derivado de hidrocarburos, así como materiais ou produtos contaminantes ou tóxicos. Tampouco se poderán facer fogueiras en lugares próximos a tendidos eléctricos, edificios ou calqueroutro no que poidan crearse situacións de perigo. E calquera fogueira terá un ou varios responsables que deberán encargarse de retirar da vía pública todos os restos, unha vez que remate a queima, e no caso de que se incumpla con todo isto o de que se produzan queixas por parte dos veciños, procederase a apagar de inmediato a fogueira”.

O alcalde sinalou que “nunca houbo problema nos últimos anos, pido civismo e un bó comportamento aos veciños e veciñas que queiran participar desta festa de profunda raigame social, que disfruten, pero que teñan coidadiño co lume”.