Concello de Ribadeo e Deputación investirán neste ano 120.000 euros no arranxo de camiños

CONCELLO E DEPUTACIÓN INVESTIRÁN NESTE ANO 120.000 EUROS NO ARRANXO DE CAMIÑOS. FERNANDO SUÁREZ AGARDA QUE A XUNTA EXECUTE AS OBRAS DA SUBIDA A NOCEDA, PARALIZADAS DESDE HAI DOUS ANOS.
Ribadeo, 4 de xaneiro de 2012. Concello de Ribadeo e Deputación de Lugo investirán no arranxo de camiños este ano 120.000 euros, segundo anunciou esta mañá o alcalde, Fernando Suárez Barcia. O rexedor agarda que a Xunta execute as obras da subida a Noceda.
Suárez Barcia explicou que “desde a área de Obras do Concello de Ribadeo seguimos traballando nas parroquias para seguir tapando vaches e amañando os camiños que iniciamos a finais do pasado ano 2012, pero que logo tivemos que suspender polas malas condicións meteorolóxicas, porque chovía e non era bo momento para continuar con estes traballos. Reanudamos agora, que hai bo tempo, imos a bo ritmo e estamos rematando o que nos quedou pendente deste ano anterior”.
O alcalde agarda que “agora, ao longo de todo este mes de xaneiro poidamos finalizar esta fase e en febreiro a ver si podemos iniciar a execución do POS, deste Plan de Obras e Servizos da Deputación, que non é moito diñeiro pero tamén nos permite ir avanzando no revacheo dalgunha parroquia máis”.
Fernando Suárez engadiu que “seguramente nesta remesa de camiños que estamos amañando non se vai poder facer todo, pero a partires de marzo e abril imos iniciar unha nova fase de revacheos de repaso xeral dos camiños municipais. Para iso contamos que neste ano 2013 tanto de fondos propios, maiormente, como tamén por parte da Deputación, en total vanse investir uns 120.000 euros para todos os camiños, que son moitísimos os quilómetros que temos na rede viaria municipal e que seguramente con todo este diñeiro non dará para deixalo todo en perfecto estado de revista, pero si para darlle unha voltiña e que non se deteriore máis seguro que vai chegar”.
O rexedor confía tamén en que “a Xunta sexa tan dilixente como está sendo a Deputación ou o Concello e, dunha vez por todas, inicie as obras paralizadas desde hai dous anos da subida a Noceda, que se vai facer con aglomerado asfáltico, tal e como indicamos desde o Concello, pero que por motivos varios e diversos aínda a día de hoxe non están executadas as obras. Confío tamén que así será e que nas próximas semanas as máquinas, tamén por parte da Xunta, empecen a traballar aquí, en Ribadeo, tal e como facemos desde o Concello co apoio da Deputación Provincial de Lugo”.