Centos de gaiteiros participarán na “Alborada para Rosalía” en vilas e cidades de toda Galicia

A Asociación de Gaiteiros Galegos promove xunto coa Fundación Rosalía, a Real Academia Galega e a Universidade de Vigo, esta alborada na que xa están inscritos máis de 50 grupos de toda Galicia. A “Alborada para Rosalía” terá lugar o vindeiro 24 de febreiro (Día de Rosalía e aniversario do seu nacemento) nas distintas vilas e cidades do pais.

Dende a AGG animamos a todos os gaiteiros e gaiteiras de Galicia a que na mañá do 24 de febreiro dean unha alborada de gloria en vilas e cidades do país interpretando unha peza na honra da nosa poeta, facendo posible que non quede ningún recuncho de terra sen o son das nosas gaitas en honor á Rosalía. Ao remate, poderán ler un manifesto no que se explica o motivo e a razón da iniciativa. Os gaiteiros que queiran participar poden informarse e anotarse na web da Fundación: http:// rosaliadecastro.org/chamamento-gaiteiros/. Nesta web poderán atopar o Manifesto, a partitura, a letra e o cartel ademais da historia e o significado desta Alborada. Tamén se lle pide aos participantes que fagan fotos e graven vídeos das súas actuacións e logo os compartan nas redes sociais co hashtag #AlboradaRosalía.

150 aniversario de Cantares Gallegos
Coas celebracións do 24 de febreiro comezan os actos do 150 aniversario da publicación de Cantares Gallegos, obra única coa que Rosalía abriu o proceso que se deu en chamar ‘Rexurdimento’ da literatura e da cultura galega. Durante todo o ano, celebrarase esta efeméride con diversas actividades (exposicións, ciclos de conferencias, concertos, publicacións, eventos a pé de rúa, etc.) a realizar en toda Galicia, e coa pretensión de que teñan réplica en varios lugares do mundo.

ALBORADAS CONFIRMADAS NA PROVINCIA DE LUGO

– Outeiro de Rei: Os Minhotos estarán a partir das 11.00 horas diante da casa
natal do poeta chairego Manuel María.

– Lugo: Caivanca, na Praza do Campo Castelo ás 12.30 horas. Sarabela Folk, no Parque de Rosalia de Castro ás 11.15h. Cántigas e Frores, actuación da Banda de Gaitas e do Coro Galego da Asociación na Muralla de Lugo (Porta de Santiago) a partir das 11.30 horas.

– Cervo: Acto poético no mercado do Souto.

– Guitiriz: A.C. Xermolos: Ás 13:30, na Rúa das Canteiras, nº 55,e logo, ás 14:00, na Rúa Castelao, nº 9, en Parga (Guitiriz): lugares onde Dona Gala, filla de Rosalía de Castro, pasou algúns veráns.

– Sarria: Saltanocribo na Rúa Maior ás 13.30 h.