A Xunta de Persoal da Área Sanitaria da Mariña esixe a retirada do decreto sobre a xestión integrada de Lugo

A Xunta de Persoal da Área Sanitaria da Mariña rexeita enerxicamente o nacemento do Decreto de Área Sanitaria da provincia de Lugo publicado polo goberno de Feijóo, que sentencia a morte a Sanidade da cidadanía da Mariña. Logo das reiteradas promesas electorais do goberno do PP nas que aseguraban que a Sanidade da Mariña nunca ía perder a súa independencia, que mantería a súa capacidade propia de xestión, este venres 05 de abril, publican un Decreto que recolle todo o contrario ao prometido, baleirando de orzamentos propios ao Hospital da Costa e poñendo nas mans de Lugo, o poder de decisión das necesidades Sanitarias da nosa Comarca, demostrando que aquelas promesas electorais eran un arma baseada no engano que so perseguía acadar a maior representación parlamentaria posible para logo, levar a cabo os seus proxectos ocultos, centralizar a Sanidade nas Cidades como paso previo á privatización da mesma, tal e como fixeron os seus homólogos de Madrid e Valencia.

Esta Xunta de Persoal culpabiliza de maneira especial aos alcaldes populares da Mariña que lonxe de defender a Sanidade da cidadanía dos seus concellos, aplauden as decisións tomadas polo seu líder, desprezando a invitación dos profesionais sanitarios e deixando claro, que non lles interesa escoitar aos que realmente coñecen as consecuencias de pasar a depender de Lugo, que non queren escoitar aos milleiros de cidadáns que apoiaron ca súa sinatura, o escrito promovido polos traballadores e traballadoras do noso Hospital pedindo un decreto de Área propia, que non queren escoitar ao resto de partidos políticos e non queren escoitar as denuncias que dende esta Xunta de Persoal, Órgano de representación das traballadoras e traballadores da Sanidade da Mariña, vimos facendo públicas, e non escoitan, porque a súa PREPOTENCIA os deixou XORDOS e a súa INCOMPETENCIA tradúcese en darlle as costas a ese pobo que cos seus votos, os colocou onde están.

Coa publicación deste decreto pasamos a ter un Xerente Executor, sen capacidade de decisión, sometido ás ordes do que diga o Xerente de Área de Lugo, en resumo, un Xerente creado para Executar na nosa Comarca as decisións que dende Lugo lle trasladen. Este Decreto persigue centralizar as especialidades en Lugo, o peche de servizos no noso Hospital e a destrución de emprego sanitario, desmantelando pouco a pouco a carteira de servizos que tiñamos e obrigando ás e ós mariñáns a desprazarse a 100km para acudir ao médico especialista e para todas aquelas intervencións cirúrxicas non urxentes. Hoxe fomos coñecedores de que usuarias da Mariña xa comezaron a recibir citación mediante carta para acudir á realización de mamografías a Lugo, rematan de publicar o Decreto, e pacientes que eran atendidas no noso Hospital, son agora obrigadas a desprazarse cara Lugo. Estas son as promesas de melloras que anuncian os dirixentes do PP, as promesas da ampliación, as promesas da Unidade de Oncoloxía, AS PROMESAS DA MENTIRA E DO ENGANO.

A Xunta de Persoal da Área Sanitaria da Mariña esixe a retirada do Decreto de Área Provincial e o cumprimento da promesa electoral coa publicación do Decreto de Área propio da Mariña, única ferramenta para garantir a continuidade e a mellora das prestacións Sanitarias tanto do Hospital da Costa como dos nosos centros de saúde.