O Concello de Cervo comeza a segunda fase do plan de accesibilidade integral que iniciou no centro urbano de San Cibrao

Cervo, 15 de maio de 2017.- O Concello de Cervo iniciou hoxe os traballos correspondentes á segunda fase do plan integral de accesibilidade, que iniciou no centro urbano de San Cibrao.

En concreto, tal e como sinalou o alcalde de Cervo, Alfonso Villares, que supervisou os traballos en compañía da edil de Servizos Sociais, Pilar Armada, e do de Obras, Plácido Pérez, “hoxe mesmo comezaron as obras na segunda fase da Avenida da Mariña que é a vía principal do núcleo, que vertebra e une os diferentes espazos urbanos da vila e na que detectamos distintas problemáticas que dificultaban a circulación dos peóns”.

Deste xeito -engadiu- “son actuacións encamiñadas á eliminación de barreiras nos trazados das beirarrúas, dos pasos de peóns e das conexións entre vías, xestionando o estacionamento de vehículos e a colocación de mobiliario urbano a fin de favorecer o tránsito dos viandantes”.
Esta segunda actuación conta cun presuponsto de 98.154,58 euros, froito dun convenio asinado coa Consellería de Medio Ambiente e Ordanación do Territorio.

Villares recordou que no mes pasado rematamos os traballos da primeira fase que supuxeron un investimento de 92.000 euros, fondos aportados tamén pola Xunta de Galicia, a través, neste caso, da Consellería de Política Social.

O obxectivo que se plantexa pois, é ir adaptando gradualmente as rúas, para mellorar a accesibilidade e facilitar a mobilidade dos peoóns, creando uns centros urbanos moito máis humanizados, e mellorando os espazos públicos co fin de que todos os veciños podan gozar do entorno de xeito libre, seguro e o máis autónomo posible.